Read Toraja-Sa'dan PA’PUDIAN 40 Bible Online

PA’PUDIAN 40 - Toraja-Sa'dan bible

PA’PUDIAN 40

¹Lu lakona pangala sengo. Misa’ pa’pudian natono’ Daud.

²Lantuk penaangku untayan PUANG, Napalempeina’ kale sia Natanannimo talinga tu pengkamoyaku,

³Mangkamo’ Naendekan diong mai liku nanii kasanggangan, diong mai buka mapullan, Napopellesei tu lentekku dao buntu batu, sia Napabantang tu tengkaku.

⁴Ia umpabu’tu nanian ba’ru dio pudukku, misa’ pa’pudi-pudian lako Kapenombanta. Buda tau la untiroi tu iannato anna kabangnga’I sia umposande’ PUANG.

⁵Maupa’ tu to umpassare kapa’rannuananna lako PUANG, sia to tang undampangngi tu to ma’patiramban, sia to sepang lako kamo’rangan.

⁶O PUANG Kapenombangku, budamo tu mintu’ penggauran kalle-kalleamMi mangka Mipogau’, sia mintu’na Mipondokangkan, tu kipomelona; tae’ misa’ apa ma’din dipasangtintiangKomi. Iake la kurundunanni sia la kupokadai, tang dikemba’mo dibilang.

⁷Iatu pemala’ pangrere’ sia kande dipemalaran tae’ Miporai, sangadinna Mipato’tokmo tu talingangku, iatu pemala’ ditunu pu’pu’ sia suru’ pengkalossoran tae’ Mianga’i.

⁸Kukuami: Tiromi, rampoMo’; nalan tu sura’ tilulun diniimo mangka ussura’i tu a’gangKu.

⁹O Kapenombangku, kuporai umpogau’i tu naalanna penaamMi, sia iatu sukaran alukMi manda’ kupariba’teng.

¹⁰Kupa’peissanammo tu kareba kaparannuan lan kombongan kalua’ iamotu diona kamaloloamMi; manassa tae’ kutampun pudukku. O PUANG, Miissan tu iannato.

¹¹Iatu kamaloloamMi tae’ kubuni len lan penaangku, sangadinna kupokadamo tu kamarurusamMi sia kamakarimmanan lu mai Kalemi, tae’ kusamboan lenni tinimbu malambe’ tu kamasokanamMi sia kamanapparamMi.

¹²O PUANG, da Mipaka’tuina’ mamaseMi; sangapaoi anna tontong untaranakna’ kamasokanamMi sia kamanapparamMi.

¹³Belanna ba’tu sangapamo kasanggangan tu tang dikemba’mo dibilang untikuina’; sia mintu’ kakadakeangku ullambirammo’. Naurunganni tang kukemba’ kutiro; mandu buda ia na mintu’ lamba’ beluakku, naurungan ranggangmo tu penaangku.

¹⁴O PUANG, kasorokanni urrampananna’, o PUANG, madomi’Komi untunduina’.

¹⁵Melo ke kasirisanni sia pada maila’i, tu mintu’ to undaka’ sunga’ku la naka’tu; melo ke sorong boko’i sola nasangi sia kasirisan, tu mintu’ to umporai ke mandasana’.

¹⁶Da’ito nalittu belanna masiri’, tu to umpa’pallakanna’!

¹⁷Melo ke mintu’ to undaka’Komi, umpoparannu sia umpopaimanKomi; melo ke mintu’ to ungkamali’ kamakarimmanan lu mai Kalemi, tontong ma’kada: La dipakasalle tu PUANG!

¹⁸Aku te mandasa sia mase-mase; apa Nakilalai siana’ Puang. Kamumo patunduangku sia perinding pala’ku, da Mimarempa to lamban, o Kapenombangku.