Read Toraja-Sa'dan PA’PUDIAN 42 Bible Online

PA’PUDIAN 42 - Toraja-Sa'dan bible

PA’PUDIAN 42

¹Lu lakona pangala sengo. Misa’ gelong bangunan ada’na to Korah.

²Susi donga ungkabarii salu, ten dukamoto tu penaangku ungkamali’Komi, o Puang Matua.

³Ma’rang tu deatangku lako Puang Matua, ondongpi lako Puang Matua matontongan; ba’tu piran kula sae la mennolo dio oloNa Puang Matua?

⁴Tae’mo kukumande sangadinna uai matangku mannamo kuparra keallo kebongi, belanna nakuan bangmo’ tau kiallo kumua: Umbamira tu Kapenombammu?

⁵Iake kukilalai tu diona te, mamalling tu penaangku lan ba’tengku: Iamotu tumbai tu kamangkangku ussolan to buda, ma’baanan lako banuanNa Puang Matua, sila’tekan sia ussa’bu’ pa’pudi-pudian, iamotu to buda tu umpakaraya allo kapua.

⁶Ma’apai ammu ma’dosso-dossora, e deatangku, sia apara bannangna ammu ma’rundede lan kaleku? Rannuanni tu Puang Matua, belanna inang la kupudipa, tu To ullendokanna’ sia Kapenombangku.

⁷O Kapenombangku, ma’dosso-dosso tu deatangku lan kaleku, iamoto angku kilalaiKomi dio mai padang Yordan sia dio mai buntu Hermon, sia dao mai buntu Mizar.

⁸Uai saba’ sitambaian, ke mongngo’i mintu’ sarambumMi; mintu’ landa-landa sia bombangMi ussamboimo’.

⁹Iake allona Napasonglo’ PUANG tu kamasokananNa, sia iake bonginna umpopenanina’ nanian dipudianNi, ondongpi misa’ passambayang langngan Puang Matua, oto’na katuoangku.

¹⁰La kukua lako Puang Matua, buntu batungku susite; ma’apari amMi tang kilalaimora’? Ma’apari angku lolang ma’pote dibolong, belanna pa’pakario-riona mintu’ ualingku?

¹¹Butung misa’ petobok lan lu bukungku, susimoto tu nabe’seanna’ mintu’ to unneana’, belanna tontong bangna’ nakuan kumua: Umbamira tu Kapenombammu?

¹²Ma’apai ammu ma’dosso-dosso, deatangku, sia apara bannangna ammu ma’rundede lan kaleku? Rannuanni tu Puang Matua, belanna inang la kupudipa, tu To ullendokanna’ sia Kapenombangku!