Read Toraja-Sa'dan PA’PUDIAN 5 Bible Online

PA’PUDIAN 5 - Toraja-Sa'dan bible

PA’PUDIAN 5

¹Lu lakona pangala sengo; dipasiala oni suling. Pa’pudianna Daud.

²O PUANG, tananni talinga tu kadangku, sia palan ara’i tu sarroku.

³Tananni talinga tu pengkamoyaku, o Datungku, o Kapenombangku, belanna mati’ Kalemi kunii malaku.

⁴O PUANG iake makale’ la Miperangii tu gamarangku, sia iake makale’ ma’pasakka’na’ massambayang mati’ oloMi angku ma’peagi.

⁵Belanna tangiaKomi Kapenomban umporai katangmekaalukan, sia iatu to kadake tang nasara ussisolangKomi.

⁶Iatu to matampo tae’ nabelai bendan dio oloMi sia Mikabiri’ tu mintu’ to umpogau’ kakelokan.

⁷La Misabu’i tu mintu’ to ma’kada tang tongan, sia iatu to umpato’do rara sia lando pa’du Nasayu pallak PUANG.

⁸Apa aku te la tamana’ banuamMi, belanna pa’kamasean kapuaMi, sia la tukkuna’ umpennoloi banua kabusungamMi situang kamatakuran mati’ Kalemi.

⁹O PUANG, rendenna’ lan kamaloloamMi, tu belanna mintu’ ualingku; rantei tu lalanMi dio tingayoku.

¹⁰Belanna tae’ bang tu tongan sun dio pudukna tau iato mai; kasanggangan napariba’tang, sia gora-gorana butung liang tungangnga’, sia paminnakan tu lilana.

¹¹Pasalai tu tau iato, o Puang Matua! Nake tobangi natumang pakira-kiranna, suale pala’i belanna buda salana, belanna nabali-baliKomi.

¹²Apa mintu’ tu to umposande’Komi la parannu. Tau iato mai la tontong unnarrak, belanna Mirinding pala’, sia mintu’ tu to ungkamali’ sangamMi la umposende paimanKomi!

¹³Belanna Mipamasakke tu to malambu’, o PUANG, sia Misarongi kamasokanan butung misa’ balulang.