Read Toraja-Sa'dan PA’PUDIAN 50 Bible Online

PA’PUDIAN 50 - Toraja-Sa'dan bible

PA’PUDIAN 50

¹Pa’pudianna Asaf. Puang Matua undaoanni mintu’ deata, Iamo PUANG, ma’kada sia untambai mintu’ banne lino randuk lan mai matallo landa’ rokko kalambunan.

²Iatu Puang Matua pangkillang dio Sion, sundun kamaballoanna.

³Iatu Kapenombanta la sae tae’ nala ma’pakappa, dio oloNa den api la ma’pamampu’, sia naguririkkI angin bara’.

⁴Metambami langngan langi’ daona lu, sia tama lino, kumua la Napaolai salunna tu taunNa:

⁵RampunanNa’ taungKu tu mekaaluk, tu mangka Kusibassean dipandanni pemala’!

⁶Langi’ umpasomboi tu kamaloloanNa. Belanna Puang Matua tu To ma’paolai salu. Sela

⁷Perangii, e taungKu, angKu ma’kada, e Israel, la Kupakanassangko, kumua: Akumo Kapenomban, tu Kapenombammu.

⁸Tang bannang diora pemala’mu Kunii untarru’iko, belanna iatu pemala’ ditunu pu’pu’mu tontong bang dio oloKu.

⁹Tang undaka’ra’ sapi laki kandean datu dio mai banuammu, ba’tu iatu mai bembe’ laki lan mai balamu.

¹⁰Belanna poissangKu tu mintu’ olo’-olo’ lan pangala’, sia iatu patuoan massa’bu ussamboi tanete.

¹¹Kutandai nasang tu manuk-manuk dao lu tanete, sia mintu’na angge menono’ dio lu kapadanganna lan nasang poissangKu.

¹²Iake moronganna tangdia’Na’, tae’ra angKu la umpokadai mati’, belanna Aku puangna te lino sola mintu’ issinna.

¹³Ma’apai angKu la ungkande duku’ sapi laki ba’tu unniru’ rara bembe’ laki?

¹⁴Pennoloanni lako Puang Matua tu pa’kurre sumangasan, sia palesso’i tu mintu’ pangallonammu lako Puang Patodoranna.

¹⁵Sia meongli’ko lako Kaleku lan kapussakan, Aku la ungkarimmanniko, ammu pakala’bi’Na’. Sela

¹⁶Apa iatu to tang mekaaluk nakua tu kadanNa Puang Matua lako: Apara battuanammu unnosso’ mintu’ aluk Kupondok, sia umpoparipuduk basseKu,

¹⁷Na mukabiri’ tu peada’, sia mutibe lako boko’mu tu mintu’ kadangKu?

¹⁸Iammu tiro misa’ to boko, ma’papada landomoko sola, sia iatu to pasandak salu lako rampanan kapa’ mutamai.

¹⁹Mupopa’elo’na tu randan pudukmu ussa’bu’ sanda kadakena sia iatu tongka’ dililamu untannun sanda pakena.

²⁰Unno’ko’ko ungkada-kadai le’to barra’mu, sia ullangdo to nadadian indo’mu.

²¹Susimoto tu penggaurammu, apa ma’loko-lokoNa’; musanga kumua iatu Aku te susiNa’ iko! Apa la Kuada’ko, sia la Kupatama tangnga’mu tu mintu’nato.

²²Parinaai tu iannate, e kamu to tang ungkilalai Puang Matua, da angKu se’bu-se’bukomi, sia tae’ misa’ tau umbelai untindokkomi.

²³Minda-minda tu umpennoloan pa’kurre sumanga’, iamo umpakala’bi’Na’, sia iatu to malolo lalanna, la Kupakitan kasalamaran lu dio mai Puang Matua.