Read Toraja-Sa'dan PA’PUDIAN 51 Bible Online

PA’PUDIAN 51 - Toraja-Sa'dan bible

PA’PUDIAN 51

¹Lu lakona pangala sengo. Pa’pudianna Daud.

²Tonna bu’tuimi nabi Natan, tonna mangka sigau’ sala Batsyeba.

³Katuru-turuina’, o Puang Matua, sitinaya kamasokanamMi, sia pa’dei tu salaku sitinaya kakapuanna mamaseMi:

⁴Pemabaseina’ dio mai kakadakeangku sia seroi pindanna’ dio mai kasalangku.

⁵Belanna kutandai tu salaku, sia iatu kasalangku tontong bang dio lindoku.

⁶Mati’ Kalemi, ondong mati’ manna Kalemi kuniimo kasalan, sia umpogau’ apa kadake dio pentiroMi, kumua amMi sanda tonganna lan bisaramMi, sia malambu’ lan pa’paolaimMi salu.

⁷Pada ditibussanammo’ kakadakean, sia pada natambukna’ kasalan mendadiangku.

⁸Tonganna Mianga’ tu kamanapparan lan ba’teng sia lan lu tang dikitanna Minii umpasomboanna’ kakinaan.

⁹Pamaserona’ supa angku masero pindan, baseina’, angku mandu mabusa anna ambun makko.

¹⁰Parangii polena’ kasendean sia kaparannuan, anna sila’tekan tu mintu’ buku lampa mangka Minisak-nisak.

¹¹Pasalaimi matamMi tu mintu’ kasalangku, sia pa’deimi tu mintu’ kakadakeangku.

¹²Pakombonganna’ lan ba’tengku tu misa’ penaa masero, o Puang Matua, sia ba’rui lan kaleku tu misa’ penaa kalebu.

¹³Da amMi sualena’ dio mai oloMi sia da amMi alai dio mai kaleku tu Penaa Masallo’Mi.

¹⁴Pasulei lako kaleku tu kaparannuan kasalamaran lu dio mai Kalemi, sia penaa mengkaolakumora la ussande’na’.

¹⁵Angku ada’i lalanMi tu to sala, anna mengkatoba’ Mati’ tu to kadake gau’.

¹⁶Lendokanna’ dio mai indan rara, o Puang Matua, Puang Matua oto’na kasalamarangku, la napopela’tek lilaku tu kamaloloamMi.

¹⁷O Puang, patiku’bi’i tu randan dipudukku, napatale’ ambunni tongka’ dililaku tu kadipudiamMi.

¹⁸Belanna tae’ Mianga’i tu pemala’ pangrere’, kenna la susito, manassa la kupemalaran; sia iatu pemala’ ditunu pu’pu’ tae’ duka naalai penaamMi.

¹⁹Iatu pesuru’ naala penaanNa Puang Matua, iamotu penaa rantang; iatu penaa rantang tang sirua-rua tae’ Mitiro bitti’i, o Puang Matua.

²⁰Tiroanni melo tu Sion sitinaya kamasorokamMi, sia pabendanni tu bentengna Yerusalem.

²¹Iapito amMi porai tu mintu’ pemala’ situru’ tu pato’na. Iamotu pemala’ ditunu pu’pu’ napurai api; maneri napemalaran tau tu sapi dao inan kapemalaran lako Kalemi.