Read Toraja-Sa'dan PA’PUDIAN 58 Bible Online

PA’PUDIAN 58 - Toraja-Sa'dan bible

PA’PUDIAN 58

¹Lu lakona pangala sengo. (Unturu’ baenan sengo:) Dandi’ bala’-bala’i. Pa’pudianna Daud; misa’ ianan ballo.

²Tonganraka unnolakomi salunna, e deata? Tang pakayun bimbangrokomika umpaolai salunna mintu’ ma’rupa tau?

³Inang tae’, sangadinna umpana’ta’komi kakadakean lan penaammi, sia mipamagasa dio kamasa’garan limammi tu timbangammi lan te lino.

⁴Mintu’ to tang mekaaluk sepangmo tempon dikianakanna, sia pusamo randuk ditibussananna tu to mo’rang.

⁵Tau iato mai keipo susi ipo ula’, sia susi ula’ rame taru ussissing talinganna.

⁶Tu noka umperangii gamaranna to ma’balik mata, iamotu to manarang umbasa-basa sengona.

⁷O Puang Matua, nisak-nisakki tu mintu’ isinna lan sadangna tau iato mai, rebong-rebongi tu mintu’ torana anak singa, o PUANG;

⁸Melo ke be’ko’i tu tau iato mai susi uai mere, iake umpessumpiranni tinaranna, melo ke bussui.

⁹Melo ke lollo’i susi suso marassan menono’, susi anak dadi sala tang untiropa allo.

¹⁰Tonna tae’pa naruai api ranga’-ranga’ keduri tu kurinmi, iatu mamatannapa sia nakandenamo api la Napabaai angin Puang.

¹¹La parannu paiman tu to malambu’ ke natiroi tu pepakkan iato, sia la nabasean lentekna tu rarana to tang mekaaluk.

¹²Naurunganni ma’kada tu tau nakua: Manassa tongan den poleanna tu to malambu’, ondongpi den tu Kapenomban ma’paolai maloloi salu lan lino.