Read Toraja-Sa'dan PA’PUDIAN 59 Bible Online

PA’PUDIAN 59 - Toraja-Sa'dan bible

PA’PUDIAN 59

¹Lu lakona pangala sengo. (Unturu’ baenan sengo:) Dandi’ bala’-bala’i. Pa’pudianna Daud; misa’ ianan ballo, tonna suai Saul tu tau untalimbung tama banuanna, la morai umpatei.

²Rampananna’ dio mai mintu’ ualingku, o Kapenombangku, rindingna’ dio mai mintu’ to unneana’.

³Rampananna’ dio mai mintu’ to umpogau’ kakadakean, sia lendokanna’ dio mai mintu’ to umpato’do rara.

⁴Belanna morai tongan unnala sunga’ku, sia mintu’ to masa’ga’ la ullaoina’, moi tae’ kapatodo-tintingangku ba’tu kasalangku, o PUANG.

⁵Tau iato mai lumumpa’ sae sia ma’kamandi’ moi anna tae’ salaku. Ke’de’Komi untunduina’, sia tiroi tu iannato.

⁶O PUANG, Kapenombanna mintu’ ma’dandan maritik, Kapenombanna to Israel, ke’de’Komi la unnada’i tu mintu’ to tang untandai kapekaalukan, da Mikatirinnai tu mintu’ to tang maruru’ sia umpogau’ kakadakean. Sela

⁷Bongi-bongi sae sule tu tau iato mai, sia mengua’-ngua’ susi asu sia sisellukan len lan kota.

⁸Pambura-bura tu sadangna ussa’bu’ pebe’se, sia mataran tu lilana susi pa’dang, belanna nasanga kumua: Mindara la urrangii?

⁹Apa Mipetaai tu tau iato mai, o PUANG, sia Mitelle-telle tu mintu’ to tang untandai kapekaalukan,

¹⁰La kutayanKomi o oto’na kamatotorangku, belanna Puang Matua kupobenteng matoto’.

¹¹KamasokananNa Kapenombangku untammuina’, pissanmi to, la Naeloran dukana’ Puang Matua untiroi tu kasangganganna mintu’ to umpandasana’.

¹²Da Mipatei tu tau iato mai, da natang ungkilalai bangsaku; sangadinna pasalamba-salaoi tu tau iato mai tete dio kuasamMi, sia tibei lao, o Puang, balulang toto’ki.

¹³Iatu motokan lilana, iamo kasalan sun dio pudukna, iamoto melo ke ditingkanni natumang matampona, sia belanna tampak ropunna sia mo’rang nasa’bu’.

¹⁴Sabu’i kasengkean tu tau iato mai, sabu’i, naurunganni sappi, anna issanni kumua Puang Matua tu Kapekapuanganna Yakub, landa’ lako randan langi’. Sela

¹⁵Bongi-bongi sae sule tu tau iato mai, sia mengua’-ngua’ susi asu sia sisellukan len lan kota.

¹⁶Tau iato mai palong undaka’ kande, sia unnurrung-urrung, ke tae’i nadia’,

¹⁷Apa iate aku la menanina’ umpudi kamatotoramMi, sia la mela’tekna’ ke melambi’ diona kamasokanamMi, Belanna Kamumo kupobenteng matoto’, sia pentilindungan tongku lan kamandasan.

¹⁸Mati’ Kalemi la umpakendekna’ pa’pudian, o kamatotorangku, belanna Puang Matua kupobenteng matoto’, Iamo Kapenomban masokanku.