Read Toraja-Sa'dan PA’PUDIAN 63 Bible Online

PA’PUDIAN 63 - Toraja-Sa'dan bible

PA’PUDIAN 63

¹Pa’pudianna Daud tonna dio padang aak, lili’na Yehuda.

²O Puang Matua, Kamumo Kapenombangku, Kamumo tu kupeangla’, napoma’rangKomi deatangku, sia nakamali’Komi kaleku, dio padang rangke sia ba’ta’, sia tang nailli’ uai.

³Susimoto la kunii umpenunuKomi lan inan kabusungan, la untiro kuasamMi sia kamala’biramMi.

⁴Belanna iatu kamasokanamMi mandu maelo ia anna katuoan; la napudiKomi tongka’ dililaku.

⁵Susimoto angku la umpudiKomi angge tuoku, sia diona sangamMi angku la umpopempala’ limangku.

⁶Iatu deatangku butung la dipedia’i sanda mammi’na sia malompona. Sia iatu randan dipudukku la mela’tek umpudiKomi.

⁷Tongku kilalaiKomi diong dali’ patindoangku, sia maroyana’ untangnga’-tangnga’Komi.

⁸Belanna Kamumo mangka untunduina’, sia diong to’ ongan pani’Mi kunii sende paiman.

⁹Tontong tu penaangku la’ka’ lako Kalemi, sia lima kananMi ussande’na’.

¹⁰Apa iatu to undaka’ sunga’ku la naka’tu, la ditombon lao rokko mangapi’na tana.

¹¹Tau iato mai la disorong lako bassi mataran, sia la napotaa sindallung.

¹²Apa iatu datu la parannu paiman tete dio Puang Matua; mintu’na tu to undudung sumpa ussa’bu’ sanganNa, la ma’sattuan, belanna iatu sadangna mintu’ to umpokada mo’rang la dikamummu’.