Read Toraja-Sa'dan PA’PUDIAN 64 Bible Online

PA’PUDIAN 64 - Toraja-Sa'dan bible

PA’PUDIAN 64

¹Lu lakona pangala sengo. Pa’pudianna Daud.

²O Puang Matua, tanding talingai tu buangan sarroku, sia rinding pala’i tu katuoangku dio mai uali metakuran;

³Rerungna’ dio mai kada turu’na mintu’ to kadake gau’, sia dio mai kamaarasanna to umpogau’ kabulitukan.

⁴Tu unnasa lilana butung la’bo’ sia unnando-ando bulianna, iamotu kada mapannang.

⁵La untinaranni to ma’bulo-lollong dio mai to’ kabunianna; tang magiang ta’pa untinaranni.

⁶Napamakarra’ tu penaanna umpogau’ kakadakean, sia sama turu’ untanan buni poya, nakua: Mindara la untiroi?

⁷Tau iato mai umpana’ta’ mintu’ kakadakean, nakua: Tepumokan, iatu kasiturusangki ditangnga’ mandalan tongan! Belanna iatu tangnga’na sola nasangi sia karangan inaanna mandalan tongan.

⁸Apa Natinaranni Puang Matua tu tau iato mai, anNa ta’pa umbangkei.

⁹Tongka’ dililana kalena untobanganni tu tau iato mai, sia minda-minda untiroi tu tau iato mai la unniling-iling.

¹⁰Anna mataku’ tu mintu’ tau sia la umpakalelean penggauranNa Puang Matua, sia untiro melo pengkaranganNa.

¹¹Iatu to malambu’ la umposende paiman PUANG, sia mentiongan lako, sia mintu’ to ma’bulo lollong la massattuan.