Read Toraja-Sa'dan PA’PUDIAN 65 Bible Online

PA’PUDIAN 65 - Toraja-Sa'dan bible

PA’PUDIAN 65

¹Lu lakona pangala sengo. Pa’pudianna Daud. Misa’ nanian.

²Lan Sion sipato’ nanii kendek pudi-pudian mati’ Kalemi, situang penaa rapa’, o Puang Matua; sia mati’ Kalemi la kinii umpalesso’ pangallonangki.

³O Puang, tu umperangii passambayangna tau, mati’ Kalemi nanii mengkara’pa mintu’na kepenaanna.

⁴Ma’rupa-rupa kakadakean untaloina’, apa mintu’ salaki la Miseroi.

⁵Maupa’ tu to Mipilei langsa’ sia to Mipopengkareke’, kumua anna torro lan tarampakMi. La dia’ tu penaangki diona kameloanna banuamMi. Iamotu kamaindanan lan banua kabusungamMi.

⁶Tete dio penggauran kalle-kallean la Minii umpebaliikan tu diona kamaloloan, o Puang Matua, oto’na kasalamarangki, sissareanna mintu’ randan langi’ sia mintu’ lelean uran.

⁷Tu diona kamatotoramMi amMi pabantang buntu, belanna umpotambeke’Komi kakuasan.

⁸Tu umparadan tasik marussa’, iamotu russa’ bombangna sia kamarukkanna tu mai to sangpetayanan.

⁹Naurunganni mintu’ to dio lelean uran ungkabangnga’ tanda kalle-kalleamMi, sia Kamu umpopela’tekki tu matallo matampu’.

¹⁰Kamumo sae umpetayanni te lino sia umpasebo uainna, sia Mipamalompo masapi. Iatu pangkalo’ Puang Matua saba’, Miben tallu bulinna tu tolino. Ondongpi Mipatepu tu mintu’na.

¹¹Kamu umpamarumpe mintu’ pa’kadaang tengko sia umpalollo’ pa’buakan tengko sia Mipemalosse’i uran dilangi’, amMi pamasakkei tu mai tananan.

¹²Kamu ummakotai kameloamMi te taun iate, sia sitana’takan tu malunakna dio mai lalan lentekMi,

¹³Unta’pai riu dio kapadanganna, na mintu’ tanete umpobelo kaparannuan.

¹⁴Mintu’ kapadanganna napemarua’i domba sia bembe’ ma’baanan sia mintu’ malompona umpobelo gandung; nasila’tekan sola nasangi sia menani.