Read Toraja-Sa'dan PA’PUDIAN 71 Bible Online

PA’PUDIAN 71 - Toraja-Sa'dan bible

PA’PUDIAN 71

¹O PUANG, Mati’ kunii mentirerung; da maro’ angku kasirisan!

²Rampananna’ sia lendokanna’ tete dio kamaloloamMi; tanannina’ talinga, sia rinding pala’na’.

³Sangapaoi anna Kamu kupobuntu batu pentirerungan, angku tang ka’tu male lako; tu mangkamo Midullu la kupoinan makarimman, belanna Kamumo buntu batungku sia tambakukungku,

⁴o Puang Matua, rampananna’ dio mai limanna to tang mekaaluk, dio mai lisu pala’na to patua’ ba’tang sia to kelok.

⁵Belanna Kamuri kapa’rannuanangku, Puangku PUANG. Tu kuposande’ tempon bitti’ku.

⁶Mati’ri Kalemi kunii sande’ tempon ditibussanangku, sia Kamuri tu umpatibongso’na’ lan mai pa’tambukanna indo’ku; mati’ri Kalemi nanii tontong kapa’pudi-pudiangku.

⁷Iatu aku butung misa’ a’gan napomangngamo buda tau, apa Kamumo pentirerungan matoto’ku.

⁸Iatu sadangku buke kapa’pudian lan lako Kalemi, sia untendeng kamala’biramMi kiallo-kiallo.

⁹Da Mitibena’, ke matuamo’, sia da Mitampena’, ke moro’mi tu bukungku.

¹⁰Belanna mintu’ ualingku ussipakulu-kuluina’, sia iatu to undaka’ sunga’ku sama turu’ undaka’ lalan.

¹¹Nakua: Natampemo Puang Matua, ulai’i sia tingkanni, belanna tae’mo misa’ To patunduanna.

¹²O Puang Matua, da dikka’ amMi toyanganna’; o Kapenombangku, madomi’Komi untunduina’.

¹³Da’ito anna kasirisan sia sanggang tu to undaka’ sunga’ku; sia da’ito nakabu’i siri’ sia pebe’se tu mintu’ to undakaranna’ kakadakean.

¹⁴Apa la tontongna’ marannu, sia la kupasakendek-kendeknapa tu kadipudi-pudianMi;

¹⁵La nasa’bu’ tongka’ dililaku tu kamaloloamMi, sia kasalamaran lu dio mai Kalemi kiallo-kiallo, belanna tang kukemba’ kuia’ tu bilanganna.

¹⁶La kupakalelean tu penggauran toto’Na Puangku PUANG, sia la kupa’peissanan tu kamaloloamMi, inang ia manna tu kamaloloamMi.

¹⁷O Puang Matua, Miada’imo’ tempon dio mai bitti’ku, nasae lako totemo kupa’peissanan tu mintu’ penggauran kalle-kalleamMi.

¹⁸Iamoto da Mitampena’ sae lako matua indukku, sia ma’lullung bura-buraku, o Kapenomban, angku pa’peissananni tu kamawatangamMi lako to dadi totemo. Sia kuasamMi lako mintu’ osso’na to dadi undi.

¹⁹Iatu kamaloloamMi sumpu langngan langi’, o Puang Matua, tu mangkamo umpogau’ ba’tu pira-pira penggauran kapua; o Puang Matua, mindaora ussitintibatuangKomi?

²⁰Kamumo tu mangka umpatiroina’ buda kamandasan sia kamaparrisan, Kamu duka sia la umpatuona’, sia la unnendekanna’ sule diong mai mangapi’na tana.

²¹Kamumo la untompoi kataromposangku, sia umpakatanana’ sule.

²²Aku duka te la kupudiKomi dandi, tu kamarurusamMi, o Kapenombangku; sia la kupakendekangKomi pa’pudian dipasiala katapi, o Puang maindanna Israel.

²³La mela’tek tu lilaku, ke kupakendekangKomi pa’pudian, ten duka deatangku to tu mangka Milendokan.

²⁴Sia la ussa’bu’ kamaloloamMi, tu dara’ lengko lilaku kiallo-kiallo, belanna mintu’ tu to undakaranna’ kadake kasirisan nasangmo sia malotong lindona.