Read Toraja-Sa'dan PA’PUDIAN 72 Bible Online

PA’PUDIAN 72 - Toraja-Sa'dan bible

PA’PUDIAN 72

¹Pa’pudianna Salomo. O Puang Matua ada’i katonganamMi tu datu, sia ada’i kamaloloamMi tu taruk bulaanna to kabarre-alloan.

²Anna tang pakayun bimbang umpaolai salunna tu taumMi, sia tang ussembe’ beko-beko to dipandasamMi.

³Sangapaoi anna mintu’ buntu, sia tanete duka umpabu’tu kamarampasan lako tau iato diona kamaloloan.

⁴Sangapaoi anna ussanda tonganni tu to dipandasa lan bangsa iato, sia urrampanan to mase-mase, anna lullu’ parapai tu to sala’ kedo.

⁵Sangapaoi anna mintu’i ussiosso’i ungkasiri’Komi, ke dellek siapi tu allo, sia ke parrang siapi tu bulan.

⁶Sangapaoi anna sitinti uran dilangi’ unta’pai padang dibela’i, sia sitinti uran umbanasa ussakka’i kuli’na padang.

⁷Sangapaoi, ke attunnami dako’, la maupa’ tu to malambu’, sia sebo tu kamarampasan sae lako pa’dena tu bulan.

⁸Sangapaoi anna ma’parenta umpasilamban-lamban tasik, sia umpasitarru’ Salu landa’ lako randan langi’.

⁹Sangapaoi anna mintu’ tu to torro dio padang pangallaran sae menomba dio olona, sia angganna ualinna la unnudung padang.

¹⁰Sangapaoi anna mintu’ datu Tarsis sia datunna tu mai lebukan la umpennoloan pamenganna, sia mintu’ datu Syeba sia Seba la umpakendek pa’kasianna.

¹¹Sangapaoi anna mintu’ datu tukku sae rokko padang dio olona, sia angganna bangsa la mengkaola lako,

¹²belanna ia la ungkaduttu’ to mase-mase, tu mengkamoya, sia to mandasa sia to tae’ to patunduanna.

¹³Ia la ungkaturu-turui to bongko sia to mase-mase, sia la ungkarimmanni deatanna to mase-mase.

¹⁴Ia la ullendokan sunga’na tau iato mai dio mai kadipakario-rioan sia kadipandasan, sia iatu rarana tau iato mai kapua angga’na dio pentirona.

¹⁵Sangapaoi anna marendeng; anna pennoloanni tau lako tu bulaan dio mai Syeba. Sia tang ka’tu kapassambayangan, sia umpalakuanni kamauparan kiallo-kiallo.

¹⁶Sangapaoi anna untonda alanna tu gandung dio lu padang, sia anna lo’le-lo’le tu buanna dao lu mentanetena susi kayu dio Libanon, sia ia duka tu to ma’tondok marumbo butung riu dio lu padang.

¹⁷Sangapaoi anna tontong sae lakona tu sanganna, ondongpi, ke den siapi tu allo, la maupa’ tu sanganna. Tete dio kalena anna marudindin tu mintu’ bangsa, sia la nasanga kumua rongko’ ia.

¹⁸Mintu’na kadipudian lu langngan nasang PUANG Kapenomban, tu Kapenombanna Israel, Ia mannari ia tu umpogau’ penggauran kalle-kallean.

¹⁹Sia mintu’ kadipudian lu langngan nasang sanga mala’bi’Na tontong sae lakona, mintu’ nalili’ lino nasamboi kamala’biranNa. Amin, ya, amin.

²⁰Sudunmo langngan lolokna tu pangandona Daud, anakna Isai.