Read Toraja-Sa'dan PA’PUDIAN 73 Bible Online

PA’PUDIAN 73 - Toraja-Sa'dan bible

PA’PUDIAN 73

¹Pa’pudianna Asaf. Manassa tongan masokan tu Puang Matua lako to Israel, iamotu lako to bannang pute penaanna.

²Apa iatu aku te sidi’mora anna tisorong tu lentekku, sia kondemora angku tilende’.

³Belanna ungkemburuna’ to matampo, tongku tiroi tu upa’na to tang mekaaluk.

⁴Belanna tae’ namaparri’ len, sangadinna manaman bang tu kalena sia pore.

⁵Tae’ namandasa len susito senga’, sia tae’ anna rumbui parri’ susito senga’.

⁶Iamo bannangnato anna luangi kamatampoan tu barokona butung manik, sia umpengkalemu’ pa’pakario-rio ten to tamangkale:

⁷Lombon tu matanna napobua’ lompona, sia tarru’ ponno tangnga’ matampo tu penaanna.

⁸Tau iato mai ma’telle-telle sia malla’ penaanna umpokada pa’pakario-rio; sia madongnga’ ma’kada.

⁹Tau iato mai mematu-matu manna kadanna sae langngan langi’, sia iatu lengko lilana untapa’ mintu’ apa lan lino.

¹⁰Iamoto anna lu lako kalena tau iato mai tu taunNa Puang, anna satta’i namimmi’ tu uainna tau iato mai.

¹¹Anna ma’kada nakua: Ma’apai anNa la unnissanni Puang Matua tu iannato? sia ma’apai anna la den paissanna tu To patodoranna?

¹²Tiromi, iamote tu a’ganna to tang mekaaluk, saurrangngan-rangnganninna iananna belanna manaman bang.

¹³Manassa tae’ gai’na tu penaa maputeku kukaritutui, sia umbasei limangku dio mai mintu’ kedo sala.

¹⁴Belanna kiallo-kiallo naruana’ parri’, sia iake melambi’ naruana’ peada’.

¹⁵Iake la lanni penaangku kumua: La ma’kada susina’ to, manassa ussolangina’ to tama bilangan bati’Mi’.

¹⁶Susito ma’tangnga-tangnga’mo’ la morai unnissanni, apa masu’sak duka kutangnga’.

¹⁷Sae lako tamana’ inan maindanNa Puang Matua, namane masero lan penaangku tu ma’katampakanna tau iato mai.

¹⁸Manassa Mipatete batu malangngo’ tu tau iato mai, sia Misumbanan anna songka tipa’ramu-ramu.

¹⁹Umba nakua tu tau iato mai narua kasanggangan metakuran lan sangkappidian mata, sappi, mangsan napobua’ apa pasanggangan:

²⁰Sitinti to tindo ta’pa tang dikilalai, ke pana’dingmiki’, ten dukamoto, o Puang, Mipaboko’i penaa tu rupanna tau iato mai, ke pana’dingKomi.

²¹Iatonna mapalla penaangku, sia sikaro-karo tu ba’tengku.

²²Attu iato bagana’ sia tang paissan, butungna’ olo’-olo’ tae’ inaanna dio oloMi.

²³Apa tontongna’ mase’pon dio Kalemi, sia manda’ Mitoe tu lima kananku.

²⁴Kamu la umpatudu lalanna’ tete dio pa’timbangamMi, naundinna to Mipatamana’ kamala’biran.

²⁵Mindara kuposande’ dao suruga? Tae’ apa senga’ lan lino kuporai, sangadinna Kamu mannari.

²⁶Moi anna sanggang tu batang kaleku sia ronta’ tu penaangku, apa Puang Matuari buntu batunna penaangku sia kupomana’ tontong sae lakona.

²⁷Belanna mintu’ to untoyangammoKomi, manassa la sanggang, ondongpi, iatu to untampeKomi ma’baliara’ senga’ la Miroto’i.

²⁸Apa iatu akunna melo aku tu mase’pon lako Puang Matua, iatu Puangku PUANG kupoperinding pala’, dikua angku pa’peissananni tu mintu’ penggauramMi.