Read Toraja-Sa'dan PA’PUDIAN 74 Bible Online

PA’PUDIAN 74 - Toraja-Sa'dan bible

PA’PUDIAN 74

¹Misa’ gelong bangunan ada’na Asaf. O Puang Matua, apa bannangna amMi tibemorakanni tontong sae lakona? Sia apa bannangna anna re’dekra tu ara’Mi lako mintu’ domba Miparibala?

²Kilalai tu kombongamMi, tu mangka Mipolean tempon dio mai, sia mangka Mipopentorro to makaka la Mipogarempong mana’, sia iatu buntu Sion, inan Minii torro.

³Umpatiangka’Komi bate lalanMi sae untiroi tu kasanggangan tang pasule-suleanna; a’a, mintu’ tu lanna inan maindan nasolang-solang uali.

⁴Mintu’ to unneaKomi melalla-lalla lan tangnga kombongamMi, sia umpabendan rapang-rapang napodeata la napotoding minanga.

⁵Iatu iannato takua to tau untadedangan uasena la umbela’ pangala’-ala’:

⁶Anna tesse-tesse nasangi tu mintu’ pareanan disura’, unnoong uase sia pepa’tong.

⁷Naballa api tu inan maindanMi, sia naruttakki tu banua nanii sangamMi sae lako padang.

⁸Nakua tu tau iato mai lan penaanna: Malekomi mai anta sabu’i nasangi tu mati’ tau! Naballa nasangmi tu banua passambayangan lako Puang Matua lan tana iate.

⁹Tae’mo tandaki kitiro, tae’ bangmo misa’ nabi, sia tae’ bangkan misa’ unnissanni, kumua ba’tu la sangapapa te iannate.

¹⁰O Puang Matua, sangapapakan la natelle tu mati’ to unneakan? Sia la tontong bangraka tu uali la untunai sangamMi?

¹¹Ma’apari amMi kondoranni tu limamMi, iamotu lima kananMi? Benanni tu limamMi, amMi sabu’i tu tau iato mai.

¹²Apa iatu Puang Matua iamo Datungku tempon dio mai, tu umpabu’tu kadilendokan lan te lino.

¹³Diona kuasamMi amMi mangka umballak tasik, sia untesse ulunna mintu’ naga lan to’ uai.

¹⁴Mangkamo Minisak-nisak tu mintu’ ulunna Lewiatan, sia Miben olo’-olo’ dio lu padang pangallaran tu duku’na la napotuo.

¹⁵Kamumo umpabu’tu kalimbuang sia umpalolong uai salu, sia umpamarangke salu kapua.

¹⁶Kamumo ampunna tu masiang sia Kamumo tu ampunna bongi; Kamumo tu umpatorroi inanna tu arrang sama lele sola batunna kulla’.

¹⁷Kamumo mangka untori’ lili’ lino, sia Kamu dukamo umpondok pealloan sia attu kamadinginan.

¹⁸O PUANG, kilalai tu diona uali untelleKomi, sia bangsa tae’ pa’inaanna untunai sangamMi.

¹⁹Da Misorongi tu bannang penaanna bu’ku’Mi lako olo-olo’ masuru; sia da Mitontong bang ungkalupai tu taumMi tu dipandasa.

²⁰Kilalai tu diona basse, belanna mintu’ inan mapattang lan lino nanii nasangmo inanna to ma’pandasa.

²¹Da’ maro’ anna sule masiri’ tu to dipakario-rio, sia iatu mintu’ to mandasa sia to mase-mase la umpudi sangamMi.

²²Ke’de’Komi, o Puang Matua, amMi pasombo katonganamMi, kilalai umba nakua tu to baga ullangdoKomi kiallo-kiallo.

²³Sia da Mitang ungkilalai tu arrakna ualimMi, belanna iatu angnga’na to umbaliKomi tontong bangmo kendek langngan.