Read Toraja-Sa'dan PA’PUDIAN 76 Bible Online

PA’PUDIAN 76 - Toraja-Sa'dan bible

PA’PUDIAN 76

¹Lu lakona pangala sengo. Dipasiala oni katapi. Misa’ sengo pa’pudianna Asaf.

²Iatu Puang Matua kalelean lan tana Yehuda, sia iatu sanganNa mala’bi’ lan tana Israel.

³Dio Salem den tu tendaNa, na dao Sion nanii banuanNa.

⁴Indemoto tu Nanii urrebong-rebong mintu’ tinaran pandillak, sola balulang sia la’bo’ sia mintu’ parea rari. Sela

⁵Pandillak-dillak tonganKomi sia mala’bi’, dao mai buntu nanii pangrampan.

⁶Mintu’ to lalong dirampamo, sia tarru’ leppeng, sia mintu’ to barani tang pa’belamo.

⁷O Kapenombanna Yakub, belanna peada’Mi, anna mintu’ kareta sola darang leppengmo.

⁸Kamumo, sia inang Kamumo tu metakuran; sia mindara la tumanan dio oloMi, ke re’dekki tu ara’Mi?

⁹Dao mai langi’ Minii umperangii pa’paolaimMi salu, mataku’mi sia bitukmi tu lino.

¹⁰Tonna ke’de’ tu Puang Matua la ma’paolai salu, la ungkarimmanni mintu’ to madiongan penaanna lan te lino. Sela

¹¹Manassa napudiKomi tu to masarrang, sia to masarrang tinampepa Mitaro’to’.

¹²Mangallonankomi sia palesso’i tu pangallonammi lako PUANG, Kapenombammi; mintu’ tu to tiku lao ungguririkki Puang, pennoloanni tu pamengan lako Puang metakuran.

¹³Tu untepok kamatampoanna tu mintu’ arung, sia umparampoi metakuranna tu mintu’ datu lan lino.