Read Toraja-Sa'dan PA’PUDIAN 77 Bible Online

PA’PUDIAN 77 - Toraja-Sa'dan bible

PA’PUDIAN 77

¹Lu lakona pangala sengo; lako Yedutun. Misa’ sengo pa’pudianna Asaf.

²Meongli’na’ langngan Puang Matua sia mengkamoyana’, sia inang meongli’na langngan Puang Matua, sangapaoi Natanannina’ talinga.

³Iatongku pussak undaka’mo’ Puang, sia ia duka kebongi tang mata’ka’na’ umpatado pala’ku, sia tang pakatana-tananna tu penaangku.

⁴Ia angku kilalai tu Puang Matua urrantangmo’ sarro; ia angku ma’pasibuyu’-buyu’, rossomi tu penaangku. Sela

⁵Kamumo tang umpasidullikna’ bulu mata, mangla’na’ sia tang tiku’bi’na’.

⁶Kukilalaimi tu attu mangka diboko’, sia mintu’ taun malaunmo.

⁷Sia ta’ka’ lan penaangku tu sengo pa’pudi-pudiangku ke bongi, ma’pasibuyu’-buyu’mo’ lan ba’tengku sia napelalan kumman penaangku, kumua:

⁸Ma’apai anna la metampe tarru’ tu Puang, sia tang la mekaturu-turuimo?

⁹Tae’ tarru’moraka tu kamasokananNa, sia sipapa’ bangraka ka’tu tu pangallu’Na?

¹⁰Tang Nakilalaimoraka Puang Matua tu kamaturu-turuanNa, sia Natampunmoraka tu mamaseNa diona sengkeNa? Sela

¹¹Kukuami: Inde sia tu karossoangku, kumua iatu penggauran lima kananNa To patodoranna lelukmo.

¹²La kukilalai tu mintu’ penggauranNa PUANG, ondongpi la kukilalai tu mintu’ penggauran kalle-kalleamMi to attu mangka diboko’.

¹³Sia la untangnga’-tangnga’na’ lalan limamMi, sia la kutimbang-timbang tu penggauramMi.

¹⁴O Puang Matua, iatu lalanMi naepun kamaseroan; mindara tu Kapenomban pada tande Puang Matua?

¹⁵Kamumo tu Puang umpogau’ apa kalle-kallean, sia mangka Mipapayan tu kuasamMi dio lu mintu’ bangsa.

¹⁶Tete dio lima matoto’Mi amMi lendokanni tu taumMi, Iamotu bati’na Yakub sola bati’na Yusuf. Sela

¹⁷Iatu mintu’ uai natiromoKomi, o Puang Matua, sia mintu’ uai rumonting untiroKomi, sae duka lako uai mandalanna ma’parondo.

¹⁸Iatu mai saliu’ umbarrakan uai, sia iatu langi’ gumalugu, sia iatu tinaranMi sipendelok-delokan.

¹⁹Iatu oni guntu’Mi menanan, sia iatu kila’ unnarrang lino, na iatu lino rumonting sia tiseno.

²⁰Iatu lalanMi lan tasik, sia lan to’ uai buda, sia iatu lalan lentekMi tae’ napayanan.

²¹Misolammo tu taumMi butung domba sia bembe’ ma’baanan. Lan lisu pala’na Musa sola Harun.