Read Toraja-Sa'dan PA’PUDIAN 78 Bible Online

PA’PUDIAN 78 - Toraja-Sa'dan bible

PA’PUDIAN 78

¹Misa’ gelong bangunan ada’na Asaf. E rapungku, rangimi te bangunan ada’ku, sia tananni talinga te mintu’ motokan lilaku.

²La umbungka’na’ randan pudukku umpokada kada peada’ to kinaa, sia umpasombo mepussakanna tempon dio mai.

³Tu mangka kirangi sia kiissan, sia iatu mangka nauleleanangkan to dolota,

⁴tae’ angki la umbunianni lanto mimi’na, sangadinna kiuleleanan papa’ sidampi’na, tu mintu’ kataromposanNa PUANG, sia kamatotoranNa sia mintu’ penggauran kalle-kallean Napogau’.

⁵Belanna mangkamo Natanan tu misa’ tanda dianna batu silambi’ dio lu tarukna Yakub, sia Napondok tu misa’ Sukaran aluk dio lu bati’na Israel, tu Napasan lako to dolota kumua anna pokadanni lanto mimi’na.

⁶Anna issanni taruk undinna, iamotu mintu’ bati’ la didadiampa tu la tulangdan anna ulelean pole’i lako bati’na:

⁷Anna umposande’ Puang Matua sola nasangi, sia da nakalupai tu mintu’ penggauranNa Puang Matua, sangadinna la nakaritutui tu mintu’ pepasanNa.

⁸Sia da nasusi nene’ to dolona tu tau iato mai, iamotu misa’ osso’ matoro sia battuk, iamotu misa’ osso’ tang ma’to’ tu penaanna, sia tae’ anna la’ka’ lako Puang Matua tu penaanna.

⁹Mintu’ bati’na Efraim, iamotu to sakka’ pa’buno tinaranna, sumoro’mo ditalo tonna parari.

¹⁰Tae’ anna toe manda’i tu basseNa Puang Matua sia manoka unturu’ atoran Sukaran alukNa.

¹¹Sia tang nakilalaimo tau iato mai tu mintu’ penggauranNa, sia mintu’ tanda kalle-kalleanNa, tu Napa’pekitanammo lako kalena.

¹²Dio tingayona nene’ to dolona Nanii Puang umpogau’ ba’tu pira-pira tanda kalle-kallean dio tana Mesir, dio padang Zoan.

¹³Naballak tu tasik anNa palambanni tu tau iato mai, Napopa’parinding tu uainna susi misa’ sapan.

¹⁴Iake allona Napaanta’i salebu’ tu tau iato mai, sia Napaanta’i arrang api tu’tu’ bongi;

¹⁵Napatibangnga tu batu dio padang pangallaran, sia Napabossai Napairu’ butung uai diong mai liku mandalan.

¹⁶Napatidollo-dollo tu ba’tu pira-pira mata uai lan mai buntu batu, sia napasumalu tu uai iato butung salu.

¹⁷Apa umpogau’ tarru’ bangora kasalan tu tau iato mai lako Kalena, sia umbali Patodoranna dio lu padang talo.

¹⁸Napasandak tu Puang Matua lan penaanna, umpalaku kande susitu kamailuanna;

¹⁹Ma’kada lako Puang Matua nakua: Ma’dinraka tu Puang Matua umpalennarangki’ kande dio padang pangallaran?

²⁰Tonganna mangkamo ussambakki buntu batu anna sun tu uai lan mai, sia bu’tu tu mata uai sumalu; apa la Nakulle siaparaka umpa’ben roti, sia umpasakkaran pa’kandian taunNa?

²¹Iamoto anNa sengke tu PUANG tonNa rangii, dukkumi tu api lako bati’na Yakub, sia le’ke’ tu kasengkeanNa lako tarukna Israel.

²²Belanna tae’ anna katappa’i tu Puang Matua sia tae’ narannuanni tu pa’tunduanNa.

²³Moi anna susito, ma’kadami Ia lako salebu’ daona lu, sia ungkillang mintu’ ba’bana langi’:

²⁴Napaurannimi manna tu tau iato mai napotuo, sia umpa’kamasean gandung lako tau iato mai dao mai langi’:

²⁵Pantan ungkandemi roti dao mai langi’, sia Napasongloran kande tu tau iato mai sadia’na.

²⁶Napopangiri’ tu angin matallo dao mai langi’, sia Napasae tu angin lu lo’ mai pollo’na uai tete dio kuasanNa.

²⁷Napauranni pa’kandian tu tau iato mai susi barra’-barra’, sia manuk-manuk kepani’ susito karangan dio biring tasik.

²⁸Naronnosan lan rante nanii tendana, sia tiku lao inan nanii.

²⁹Kumandemi tu tau iato mai sadia’na tongan, sia Naben tu nadaka’na.

³⁰Apa tae’pa anna paliu pandaka’ penaanna tu tau iato mai, sia lan bang sia sadangna tu kande,

³¹tu’ba’mi tu kasengkeanNa Puang Matua lako tinde tau, anNa patei tu mintu’ tau tu malomponamo, sia Natebang tu mintu’ to Israel mangura.

³²Moi anna susito, umpogau’ poleomo kasalan tu tau iato mai, sia tae’ anna katappa’i tu penggauran kalle-kalleanNa.

³³Iamoto anNa roto’i punala bangi tu mintu’ allo katuoanna, sia Mepatiramban tu kadiputtaianna taun kalolanganna.

³⁴Iatonna pateimi tu tau iato mai, maneri naanga’ tu Puang, anna tibalik pakkan undaka’ Puang Matua.

³⁵Sia nakilalaimo tau iato mai, kumua iatu Puang Matua Iamo buntu batunna, sia Puang Matua Patodoranna, iamo patunduanna.

³⁶Apa iatu tau iato mai umbangko malute Puang, sia umpakena Puang tete dio bisaranna.

³⁷Belanna tae’ anna ma’to’ tu penaanna lako Puang sia tae’ anna toe manda’i tu basseNa.

³⁸Apa belanna kamamaseanNa Naseroi tu salana tau iato mai sia tae’ Nasabu’i; nenne’ poleo’I unta’tan sengke budanNa, sia untemme’ ara’ rumeke-mekeNa.

³⁹Belanna nakilalai tu diona tau iato mai kumua a’gan batang kale, tu butung rambu pa’de poton, sia tae’mo nabu’tu sule.

⁴⁰Ba’tu pempiran tu tau iato mai battuk lako Kalena dio lu padang pangallaran, sia umpa’di’i penaanNa Puang dio lu padang talo,

⁴¹sia ussandak poleopi Puang Matua, sia umparosso To masero pindanna to Israel.

⁴²Tae’ anna kilalai lenni tau iato mai tu lima matoto’Na, sia iatu allo nanii Puang ullendokanni dio mai to umpakario-rioi.

⁴³Tonna padenni tu mintu’ tanda kalle-kalleanNa dao tana Mesir, sia mintu’ tanda mangngaNa dio padang Zoan.

⁴⁴Napopembali rara tu uainna lan salu Nil, sia mintu’ uai lolongna, naurunganni tae’ nairu’.

⁴⁵Napasae tu tabuan balo tu ussabu’i tu tau iato mai, sia tokko’ urratoi tau iato mai.

⁴⁶Iatu bura padangna tau iato mai Napakandei ulli’, sia ia duka tu polean ra’ta’na Napakandei batik.

⁴⁷Napasanggangi uran batu tu mintu’ anggoro’na, sia ambun maka’dang tu ara pangala’na;

⁴⁸Napopa’elo’na tu uran batu anna sanggangi tu patuoanna tau iato mai sia mintu’ olo’-olo’na nasanggangi kila’ silalle-lalle.

⁴⁹Naparampoi kamare’dekanNa tu tau iato mai sia kasengkean sia kamagallian sia kamandasan, iamotu misa’ porimpunganna malaeka’ umbaa kasanggangan.

⁵⁰Napatu’ba’ tu kasengkeanNa, sia tae’ Narinding pala’i tu deatanna tau iato mai dio mai kamatean. Sangadinna Nasorong tu sunga’na lako saki ropu.

⁵¹Napatei nasang tu anak pa’bunga’ dio Mesir, iamotu bunga’na kamabukuanna lan mintu’ tendana Ham.

⁵²Apa Napasangtiangkaran Nasolan sun tu taunNa butung domba sia bembe’ ma’baanan, sia Naturu’ mana’pa dio lu padang pangallaran ten patuoan.

⁵³Narenden marampa’ tu tau iato mai, naurungan tae’ namataku’, belanna mintu’ ualinna malabumo lan tasik.

⁵⁴AnNa solanni tu tau iato mai sae lako lili’ inan maindanNa, lako te buntu iate tu mangka Naappa’ tete dio lima kananNa.

⁵⁵Naula’i lao tu mintu’ bangsa dio mai to’ olona tau iato mai, sia nataa-taa tu padangna Nasuka’ tinting la napomana’ tau iato mai, anNa panno’ko’i tu mintu’ sukunna to Israel lan tendana tau iato mai.

⁵⁶Apa nasandak tau iato mai tu Puang Matua, sia unnea lako Puang, Patodoranna, sia tang unturu’ kasa’bianNa.

⁵⁷Sangadinna sorong boko’ sia tang mana’pa’ susito dolona, sia tipero’ susi tinaran pasala.

⁵⁸Tau iato mai umpare’dek ara’Na Puang diona kamenombanna dao lu inan madao, sia umpabu’tu pangimburuanNa diona mintu’ rapang-rapangna napodeata.

⁵⁹Lendu’ ia sengkeNa tu Puang Matua tonna rangii tu iannato, anNa sa’bianganni tu mintu’ to Israel.

⁶⁰Naurunganni Nasalai tu tenda dio Silo, tu tenda Napabendan dio to’ naninna tolino;

⁶¹Napopa’elo’na tu kamatotoranNa dirampa, sia iatu kamala’biranNa tama lisu pala’na uali.

⁶²Napopa’elo’na tu taunNa nakande bassi mataran, belanna lendu’ tongan sengkeNa lako to Napotau.

⁶³Iatu mai to manguranna pura nalalle api, sia mintu’ tu mai anak dara tae’mo anna ditendeng sengo rampanan kapa’.

⁶⁴Siapanammo tu mintu’ to minaanna nakande bassi mataran, natae’ anna batingi to balunna.

⁶⁵Attu iato malima’ka’mi tu Puang sangtinti to pana’ding, sia ten pa’barani napakapua uai anggoro’ tu penaanna.

⁶⁶Nasambakki dio mai boko’ tu mintu’ ualinNa, sia Naparampoi kamatunan tang pa’de-pa’de.

⁶⁷Apa Nasuale pala’ tu tendana Yusuf, sia tae’ anNa turo ta’bai tu suku Efraim.

⁶⁸Sangadinna Naturo ta’ba tu suku Yehuda, sia iatu buntu Sion tu Napa’budai.

⁶⁹AnNa bangunni tu inan maindanNa butung inan matande, sia butung lino tu Naparandanganni matoto’ tontong sae lakona.

⁷⁰Naturo ta’ba tu Daud, taunNa, anNa sarakki lan mai bala domba:

⁷¹Nasarakki dio mai boko’na mintu’ domba sumusu la ungkambi’ Yakub, taunNa, sia Israel to Napotau.

⁷²Ia ungkambi’i tu tau iato mai sitinaya penaa lambu’na, sia narenden lima malutena tu tau iato mai.