Read Toraja-Sa'dan PA’PUDIAN 79 Bible Online

PA’PUDIAN 79 - Toraja-Sa'dan bible

PA’PUDIAN 79

¹Pa’pudianna Asaf. O Puang Matua, natamaimo to kapere’ tu apamMi, sia urruttakki banua kabusungamMi, ondongpi napatombonan batu tu Yerusalem.

²Napakandeimo manuk-manuk dao lu langi’ tau iato mai, tu batang rabukna taumMi, sia napakandei olo’-olo’ lampung dio lu padang tu duku’na to masallo’Mi.

³Napatibollo tu rarana butung uai dio lu tikunna Yerusalem, sia moi misa’ tau tae’ ullamunni.

⁴Napobe’seammokan sangtondokki, sia Napotule’-tuleran sia Napoparumbasanmokan bali lembangki.

⁵Sangapapira, o PUANG? La tontong bangraka tu kasengkeamMi? Sia iatu kapangimburuamMi la ma’pamampu’raka susi api?

⁶Patu’ba’i kasengkeamMi lako to tang untandaiKomi, sia lako mintu’ lili’ parenta tang metamba ussa’bu’ sangamMi.

⁷Belanna naampello’mo tu Yakub, sia nasanggang-sanggang tu inanna.

⁸Da Mipasisurungkan salana to doloki, sangapaoi anna tammuikanni mamaseMi madomi’, belanna tang pa’bela tonganmokan.

⁹Tunduikanni, o Puang Matua, oto’na kasalamarangki, tete dio kamala’biranna sangamMi; rampanangkanni sia basei tu mintu’ kasalangki, tu belanna sangamMi.

¹⁰Apara bannangna anna la ma’kadara tu to kapere’ kumua: Umbamira tu Kapenombanna? Melo ke naissanni to kapere’ dio tingayoki, tu diona kaMipembalianganna tu mai rarana taumMi tu mangka dipato’do.

¹¹Melo kerampoi lako oloMi tu sarrona to dirampa, sia belanna kakapuanna kuasamMi rinding pala’i dikka’ tu mintu’ to dilampakmo la dipatei.

¹²Na lako bali lembangki papakkanni manglokkon pempitu tama rianna tu pebe’se mangka nabe’seangKomi, o Puang.

¹³Na kami te, taumMi, sia domba Mikambi’, la umpudiKomi tontong sae lakona, sia kisiosso’i umpa’peissanan kadipudi-pudiamMi.