Read Toraja-Sa'dan PA’PUDIAN 8 Bible Online

PA’PUDIAN 8 - Toraja-Sa'dan bible

PA’PUDIAN 8

¹Lu lakona pangala sengo. Unturu’ baenan sengona Gitit. Pa’pudianna Daud.

²O PUANG, o Puangki, tang pada mala’bi’na tu sangamMi lan mintu’ narande tana, Mipadaomo langi’ tu kamala’biramMi!

³Dio pudukna pia sia pia malia Minii untanan kamatotoran unno’ton mintu’ ualimMi, amMi tang umpasumui tu mintu’ ualimMi sia to untambuk essun.

⁴Iangku tingara langi’Mi, panggaraga limamMi, sia bulan na bintoen tu mangka Mikombong:

⁵Apa toda ia tu tolino amMi kilalairi, ba’tu iatu bati’ tolino amMi sailei?

⁶Moi susito, Mipamadiongan sidi’ri tu a’ganna anna Kapenomban, sia Mimakotaimo kamala’biran sia kadipangkeran.

⁷Sia mangka Miangka’ umparenta mintu’ panggaraga limamMi, iatu mintu’na Mipopengkanorongmo diong to’ lentekna:

⁸Mintu’ domba sia sapi sola nasangi, sia mintu’ olo-olo’ dio lu padang.

⁹Mintu’ manuk-manuk dao lu langi’ sia mintu’ bale lan tasik, iamotu mintu’ menono’na sumayo lan tasik kalua’.

¹⁰O PUANG, o Puangki, tang pada mala’bi’na tu sangamMi lan mintu’ narande tana!