Read Toraja-Sa'dan PA’PUDIAN 81 Bible Online

PA’PUDIAN 81 - Toraja-Sa'dan bible

PA’PUDIAN 81

¹Lu lakona pangala sengo. Unturu’ baenan sengo: Gitit. Pa’pudianna Asaf.

²Ra’ban-ra’bankomi umpenanian Puang Matua, tu tapopamuntu, pela’tekanni tu Kapenombanna Yakub.

³Menanikomi, sia pannonii tu ganda’-ganda’, sia katapi merio’-rio’ oninna sia dandi.

⁴Pannonianni tarompe’ pua tu allo madatunta ke bunga’ sombonai bulan sia iake malimbunnai bulan.

⁵Belanna iatu iannato iamo aluk dipondokan to Israel, sia atoranna Kapenombanna Yakub.

⁶Iatu iannato Napantok napobatu silambi’ bati’na Yusuf, tonna sun tu Puang umpasulei tana Mesir. Urrangimo’ misa’ kada tang kupebuyu’, nakua:

⁷Akumo ussondokan panglemba dao mai palempengna, anna tilendok lu limanna dio mai pangrengnge’.

⁸Aku urrinding pala’ko tommu meongli’ lan attu kapussakkan, sia Aku umbaliko guntu’ lan mai massalebu’na; Kusandakmoko dio Meriba. Sela

⁹E taungKu, patananni tu talingammu, la Kumotokkiko lila pa’pakilala; e to Israel, ke la moraiko umperangiiNa’!

¹⁰Da muden umpekalangka’i deata to senga’, sia da mupenombai deata to salian lembang.

¹¹Akumo, PUANG, Kapenombammu, tu mangka ussolangko sun lan mai tana Mesir; popengangai tu sadangmu angKu ponnoi.

¹²Apa iatu taungKu noka umperangiiNa’, sia tae’ naporaiNa’ to Israel.

¹³Iamoto angKu popa’elo’nai lan katoroge’geranna; naurungan unturu’ bang lalan tangnga’na.

¹⁴Kenna perangiiNa’ taungKu, sia kenna turu’i to Israel tu pepasanKu!

¹⁵Manassa ta’pa Kupatunduk madomi’ tu mai ualinna, sia Kupasulei limangKu tu mai to unneai.

¹⁶Mintu’ to ungkabiri’ PUANG, anna tang mengkaola lako Kalena, anna angga’-angga’i bang, sia iatu kamasolanganna to mabiri’ la tontong sae lakona.

¹⁷Manassa tau iato mai la Napakande mapulu’na gandung, sia la Kupedia’i tani’ lan mai sapak batu.