Read Toraja-Sa'dan PA’PUDIAN 85 Bible Online

PA’PUDIAN 85 - Toraja-Sa'dan bible

PA’PUDIAN 85

¹Lu lakona pangala sengo. Pa’pudianna bati’na Korah.

²O Puang, naalamo penaamMi tu padangMi. Mipopembalimo tu torro ke’de’na bati’na Yakub:

³Mipagarri’mo tu kapatengkanna taumMi, sia Mipai’pinnimo batu mapipang tu kasalanna. Sela

⁴Mirampanammo tu mintu’ kare’dekan ara’Mi, sia Mitoyangan tu Kalemi dio mai kasengkean ma’lulu-lulumMi.

⁵Pasulekan tama dandanki, o Puang Matua, oto’na kasalamarangki, sia pa’deimi tu kasengkeamMi lako kaleki.

⁶La tontong bangroKomika sae lakona ussengkeikanni? Sia tontongraka la Mipaparan bati’ki tu kasengkeamMi?

⁷Tae’raka amMi la umpapayakan sule anna poparannuKomi taumMi?

⁸Pakitammokan kamasokanamMi, o PUANG, sia benkanni tu kasalamaran lu dio mai Kalemi.

⁹La kuperangii tu apa Napokada Puang Matua, PUANG. Belanna la umpokada kamarampasan lako taunNa sia lako mintu’ to sallo’Na; podo da natibalik tu tau iato mai sule lako kabaganna.

¹⁰Manassa iatu kamakarimmanan lu dio mai Kalena marengke’ lako mintu’ to ungkataku’I. Naurunganni tonang tu kamala’biran lan tondokta.

¹¹Iatu kamasokanan sia kamarurusan sitammu sikurre sumanga’, sia kamaloloan anna kamarampasan sipa’dikkanan.

¹²Iatu kamarurusan la bu’tu diong mai atena padang. Na iatu kamaloloan la mentiro lumbang dao mai ba’tangna langi’.

¹³Sia la umbengan duka kameloan tu PUANG, anna kendek burana tu padangta.

¹⁴Iatu kamaloloan la undoloanNi, sia la umpapatui bate lalanNa.