Read Toraja-Sa'dan PA’PUDIAN 9 Bible Online

PA’PUDIAN 9 - Toraja-Sa'dan bible

PA’PUDIAN 9

¹Lu lakona pangala sengo. Unturu’ baenan sengo: Mate ussonda anakna. Pa’pudianna Daud.

²La ponno penaangku umpudiKomi, o PUANG, sia la kuulelean tu mintu’ penggauran kalle-kalleamMi.

³La parannu paimanna’ sia lo’dok to kaiyangan dio Kalemi, la kupenanian pa’pudian tu sangamMi, o Puang Patodoranna!

⁴Belanna sumoro’mo tu mintu’ ualingku, tisumbangmo anna mangsan dio oloMi.

⁵Belanna Miposara’mo tu kara-karaku sia panuntunku, unnisungmoKomi dao isungan butung to ma’paolai salu tang pakayun bimbang.

⁶Migarra’mo tu mintu’ bangsa, sia Mirabunnimo mintu’ to tang mekaaluk, Mibutaimo tu sanganna tontong sae lakona.

⁷Iatu uali tappumo narua kasanggangan — tondok daun lauan sae lakona — , sia mintu’ tondok mangka Misaeran, pa’de dukamo tu tanda pengkilalanna.

⁸Apa iatu PUANG unnisungi isunganNa tontong sae lakona, sia napatorro melomo tu isunganNa la Nanii ma’paolai salu.

⁹Puang la umpaolai malambu’i salunna te lino, sia umpaolai pangra’ta’ malolo tu mintu’ to sangpetayanan.

¹⁰PUANGmo tu napobenteng malangka’ mintu’ to dipakario-rio, Iamo tambakuku lan attu kamandasan.

¹¹La narannuangKomi tu mintu’ to untandai sangamMi, belanna tae’ bangpa Mitampe lenni tu to undaka’Komi, o PUANG.

¹²Pakendekki tu pa’pudian langngan PUANG tu unnisung dao Sion, pa’peissananni tu mintu’ penggauranNa dio lu mintu’ bangsa,

¹³belanna Ia tu To umpembaliangan to’doan rara, Nakilalai tu tau iato mai, tae’ anNa tananni boko’ tu pengkamoyana to dipandasa!

¹⁴Kamaseina’, o PUANG, tiroi tu kanapandasangku to ungkabiri’na’, o Puang, tu unnendekanna’ lan mai baba liang,

¹⁵Kumua angku uleleanni tu mintu’ penggauran mala’bi’Mi, angku lo’dok to kaiyangan lan babanganna anak dara Sion belanna kasalamaran lu dio mai Kalemi.

¹⁶Mintu’ bangsa mellambunmo rokko patuang lambe’ pambo’bokna, sia iatu lentekna nala’ka’i poya natanan buni.

¹⁷Umpasombomo Kalena tu PUANG, sia umpabantang katonganan, iatu to tang mekaaluk naala poya panggaraganna kalena. Higgayon. Sela

¹⁸Ondongpi iatu to tang mekaaluk tipero’ rokko lino to mate, iamotu mintu’ bangsa untananni boko’ Puang Matua.

¹⁹Belanna iatu to kalala’ tae’ nala tontong bang dikalupai, iatu kapa’rannuananna to dipandasa tae’ nala torro sala bang tontong sae lakona.

²⁰Ke’de’Komi, o PUANG, da napasau’ tu tolino, melo ke dipakannai ukungan tu mintu’ bangsa dio oloMi.

²¹Parampoi kamatakuran tu tau iato mai, naissanni mintu’ bangsa kumua iatu tau iato mai a’gan tolino bangri. Sela