Read Toraja-Sa'dan PA’PUDIAN 90 Bible Online

PA’PUDIAN 90 - Toraja-Sa'dan bible

PA’PUDIAN 90

¹Passambayangna Musa, to Natonno’ Puang Matua. O Puang, Kamumo tu mangka kipentilindungi tontong kisiosso’i.

²Tonna tang dikombongpa tu buntu, sia tonna tae’pa amMi randukki tu kuli’na padang anna lino, tempon dio mai landa’ lako attu disituran-turananni. Inang Kamumo tu Puang Matua.

³Kamumo umpasule tolino lako litak, Mikua ma’kada: Sulekomi, e mintu’ ma’rupa tau.

⁴Belanna iatu passangamMi sangsa’bu taunna, butungri to allo sangmai’ mane mangka lendu’, sia butung sangteponari bongi.

⁵Mipatallan tu tau iato mai; sia butung to mamma’ sule ke melambi’, sia ten to riu lobo’ tuona.

⁶Iake melambi’pi menta’bi sia lobo’, anna iake makaroenni sae, malayu anna marangke.

⁷Belanna sabu’kan diona kasengkeamMi, sia roto’kan diona kare’dekamMi.

⁸Midandan nasangmo dio oloMi tu mintu’ kakadakeangki, sia iatu kasalan membuningki naluangmo arrang oloMi.

⁹Belanna mintu’ allo katuoangki roto’mo diona kasengkeamMi, sia kiupu’imo tu katuoangki butung to tindo.

¹⁰Iatu mintu’ allo katuoangki, pitungpulo taunna, iake marendengkanni karua pulona taunna; apa iatu diposattuanna to, kamasussan manna sia karossoan, bellanna madoi’ bang lendu’, angki pa’de poton.

¹¹Mindara unnissanni tu kuasa kasengkeamMi, sia kare’dekamMi, sipato’na kadikatakuramMi.

¹²Iamoto ada’ikan umbilang mintu’ alloki, angki appa’ penaa kinaa.

¹³MessailemoKomi, o PUANG! SangapaporoKomi tang la messaile? Ala masei tu mai taumMi.

¹⁴Pedia’i kamasokanamMi tu penaangki ke melambi’, angki mela’tek sia sende paiman angge tuoki.

¹⁵Pasendei tu penaangki sitinaya tu allo mangka Minii umpakario-riokan sia sitinaya taun kunii mangka untiro kamandasan.

¹⁶Sangapaoi anna payan lako mintu’ taumMi tu penggauramMi, sia payan lako lanto mimi’na tu kamala’biramMi.

¹⁷Sangapaoi anna rampoikan kamana-mananNa Puang Kapenombangki, sia patontongangkan tu lalan limangki, ondongpi iatu lalan limangki la Mipatontong.