Read Toraja-Sa'dan PA’PUDIAN 96 Bible Online

PA’PUDIAN 96 - Toraja-Sa'dan bible

PA’PUDIAN 96

¹Penaniammi PUANG tu misa’ nanian ba’ru, sia penaniamMi tu PUANG, e mintu’ issinna lino.

²Penaniammi tu PUANG, sia pudii tu sanganNa; pasitarru’-tarru’i tu allo Minii umpa’peissanan kasalamaran lu dio mai Kalena.

³Pakaleleammi tu kamala’biranNa dio lu mintu’ bangsa, sia iatu penggauran kalle-kalleanNa dio lu mintu’ to sangpetayanan.

⁴Belanna pasareongan tu PUANG sia sipatu tongan dipudi, mandu metakuran Ia na mintu’ deata.

⁵Belanna iatu mai deatanna mintu’ bangsa, dipa’deatainna bangri, apa PUANG Ia tu ungkombong langi’;

⁶Dio oloNa tu tanda kabilangan sia kadipangkeran, anna kapaan sia kamala’biran lan inan maindanNa.

⁷E mintu’ suku bangsa, palulakoi PUANG, palulakoi PUANG tu kadipangkeran sia akui tu kuasanNa.

⁸Ondongpi palulakoi PUANG tu kamala’biranna sanganNa, pennoloanni tu pemala’, ammi tama tarampakNa.

⁹Tukkukomi menomba lako PUANG umpokassa’ pakean maindan, la ma’parondokomi dio oloNa, e mintu’ issinna lino!

¹⁰Pokadai dio lu mintu’ bangsa, kumua: PUANG untoe kapayungan, iamoto anna bantang tu lino, naurunganni tang tibendon; Puang tang pakayun bimbang la umpaolai salu tu mintu’ bangsa.

¹¹Melo ke sende paimanni tu langi’, anna mela’tek tu lino, sia la mongngo’ tu tasik sola mintu’ issinna lan.

¹²Melo ke lo’dok to kaiyanganni tu padang sola mintu’ tu denna; attu iato mintu’ kayu lan pangala’ la unnarrak.

¹³Dio oloNa PUANG, belanna la sae, manassa la sae la umpaolai salunna lipu daenan; la Napaolai malambu’ salu te lino, sia mintu’ bangsa sitinaya kamarurusanNa.