Read Toraja-Sa'dan PA’PUDIAN 97 Bible Online

PA’PUDIAN 97 - Toraja-Sa'dan bible

PA’PUDIAN 97

¹PUANG tu untoe kapayungan: la mela’tek tu lino, sipatu tu lebukan ma’lako-lakoan la sende paiman.

²Iatu gaun sia kamalillinan untikui lao, sia kamaloloan sia katonganan napoparandangan isungan kapayunganNa.

³Iatu api mellepa’ dio oloNa Puang. Umpamampu’ mintu’ ualinNa tiku lao.

⁴Kila’Na unnarrang te lino, natiroi lino anna ma’parondo.

⁵Mintu’na buntu lollo’mo butung panti’ dio oloNa PUANG, dio oloNa Puangna anggenna lipu daenan.

⁶Iatu kamaloloanNa napatale’ langi’ sia mintu’ bangsa untiromo kamala’biranNa.

⁷Da’ito nakasirisan tu mintu’ to umpenombai rapang-rapang dipodeata panggaraga lima. Iamotu to ussattuan dipa’deatainna; e mintu’ deata, penombai tu Puang.

⁸Iatu iannato narangimo Sion, anna parannu, sia mintu’ anak dara Yehuda sila’tekan, tu belanna mintu’ pa’paolaimMi salu, o PUANG.

⁹Belanna Kamumo, o PUANG, tu patodoranna lan mintu’ narande tana, sia Kamumo tu layukna anna mintu’ deata.

¹⁰E kamu, mintu’ to ungkamali’ PUANG, la mikabiri’ tu kakadakean. Iamo urrinding pala’ deatanna mintu’ to masallo’Na. Sia urrampananni lan mai lisu pala’na to tang mekaaluk.

¹¹Iatu arrang dipasomboan to malambu’, sia iatu kaparannuan dipabu’tuan to bulo lollong.

¹²E kamu to malambu’, la umpoparannukomi PUANG, sia pudii tu sanga maseroNa.