Read Toraja-Sa'dan SARAMBU PEADA’ 11 Bible Online

SARAMBU PEADA’ 11 - Toraja-Sa'dan bible

SARAMBU PEADA’ 11

¹Iatu timbangan sala Napomagalli PUANG, apa iatu batu timbangan tongan Naposende.

²Iake saei tu kamatampoan, la sae duka tu siri’, apa iatu to umpamadiong penaanna narondong kakinaan.

³Iatu kamalamburanna to bulo lollong iamo unnanta’ meloi, apa iatu penaa leko’na to tang maruru’ la naposanggang.

⁴Iatu kasugiran tae’ gai’na, ke attu kasengkeanNa Puang, apa iatu kamaloloan melendokan dio mai kamatean.

⁵Iatu kamalamburanna to sallo’ umpamarante lalanna, apa iatu to tang mekaaluk tobang natumang katangmekaalukanna.

⁶Iatu kamaloloanna to bulo lollong iamo la ullendokanni tu tau iato mai, apa iatu to tang maruru’ natingkan kamailuanna kalena.

⁷Iake matemi tu to tang mekaaluk puttamo to tu pa’rannuananna sia iatu apa naanga’ to kadake la pa’de.

⁸Iatu to malambu’ la dirampanan lan mai kapussakan, na iatu to tang mekaaluk tama ussondai.

⁹Tete dio pudukna to bulituk anna sanggangi padanna ma’rupa tau, apa tete dio kapaissanan anna lendokan kalena tu to malambu’.

¹⁰Mintu’ pa’tondokan umpoparannui tu kamauparanna to malambu’, apa iake sanggangi tu to tang mekaaluk, unnarrak-arrak tu mintu’ tau.

¹¹Bannang dio kadipamasakkeanna to bulo lollong anna dipamarua’ tu kota, apa buntu tumangna pudukna to tang mekaaluk, anna disanggang tu kota.

¹²Minda-minda ullo’bo padanna ma’rupa tau, tae’ naampui tangnga’ kinaa; apa iatu to unnampui tangnga’ kinaa ma’pakappa.

¹³Minda-minda tu ma’palele kadake, iamoto manglo’do’ rasia, apa minda-minda tu maruru’, iamo ussamboi tu apa mangka dadi.

¹⁴Iake tae’i pa’timbangan melo, la sanggang tu bangsa, apa dipotilendok tu kabudanna pa’bisara.

¹⁵Minda-minda tu unnindo’i indanna to tama sae, manassa la narampoi kamasussan, apa minda-minda tu untoyangan kalena dio mai massala’pa la torro manaman.

¹⁶Misa’ baine mabalele unnappa’ kadipangkeran, susi duka tu to lalong unnappa’ kasugiran.

¹⁷Iatu to masokan umpogau’ kameloan deatanna, apa iatu to toro, umpandasa kalena.

¹⁸Iatu to tang mekaaluk ungkabu’tu’i saro tang ma’pamaupa’, apa iatu to unnambo’ kamaloloan, ungkabu’tui saro matontongan.

¹⁹Iatu kamaloloan tongan umpatu katuoan, apa minda-minda tu untuntun bang kakadakean, umpadenan kalena kamatean.

²⁰Iatu to leko’ penaanna Nakagalli PUANG, apa iatu to malolo gau’na iamo Naposende.

²¹Tonganna, iatu to kadake gau’ tae’ natilendok len dio mai ukungan, apa iatu to naala bilanganna to malambu’ la tilendok.

²²Susitu sissin bulaan dio kasube bai, susi dukato tu baine ballo tu tang unnampui tangnga’ melo.

²³Iatu apa naanga’ to malambu’, kamauparan manna napaden; apa iatu apa narannuan to tang mekaaluk kasengkean manna napaden.

²⁴Den tu tau mangambo’, nabuda pole’ nakabu’tui; den tu tau ungkanengkengi tongan iananna, apa kapu’duran duka sia.

²⁵Iatu penaanna to ma’pamasakke la dipaliu manaman, sia minda-minda mamase, la dikamasei duka.

²⁶Minda umpatadang gandung, la natampakki ropu to buda; apa iatu rongko’ songlo’ dao ulunna to ma’baluk gandung.

²⁷Minda-minda tu untuntun melona, undaka’ kapaimanan; apa minda-minda unnanga’ bang kadakena, la narampoi duka kakadakean.

²⁸Minda-minda tu umposande’ kasugiranna, la tobang; apa iatu mintu’ to malambu’ la mentaruk susi daun mangura.

²⁹Minda-minda tu umpopa’elo’na bang banuanna, la umpomana’ angin; sia iatu to baga la dadi kaunan lako to kinaa.

³⁰Iatu buanna to malambu’ iamo sangto’ kayu katuoan sia minda-minda tu kinaa, ungkadamak tau.

³¹Tonganna, iatu to malambu’ la dipakkan dao kuli’na padang, ondong pole tu to tang mekaaluk sia to kadake gau’na.