Read Toraja-Sa'dan SARAMBU PEADA’ 16 Bible Online

SARAMBU PEADA’ 16 - Toraja-Sa'dan bible

SARAMBU PEADA’ 16

¹Iatu tolino ba’tu pira-pira tu pa’timbangan lan penaanna, apa iatu pebalinna lila bu’tu lu dio ia mai PUANG.

²Mintu’ tu lalanna simisa’-misa’ tau masero dio pentirona, apa PUANG ussudii tu penaanna.

³Sorongi tu mintu’ pengkarangammu lako PUANG, iake susimito, la dadi tu tanan penaammu.

⁴Mangkamo Napadadi PUANG tu mintu’na la unturu’i tu lalan pa’inaanNa, moi na iatu to tang mekaaluk, la Naparampoi duka allo kamandasan.

⁵Minda-minda matampo penaanna Nakagalli PUANG; manassa tae’ nala tilendok dio mai ukungan.

⁶Iatu kakelokan napa’dei pa’kaboro’ sia kamarurusan, sia bannang dio kamatakuran lako PUANG, anna toyang tu tau dio mai kakadakean.

⁷Iake naalai penaanNa PUANG tu lalanna misa’ tau, Puang Kalena umpasikaeloi ualinna.

⁸Iatu polean sidi’, ke naturu’i kamaloloan mandu melo, na iatu polean buda naturu’ kakelokan.

⁹Iatu penaanna tolino untangnga’-tangnga’ lalanna, apa PUANG unnato’i tu tengkana.

¹⁰Iatu pangra’ta’Na Puang dio pudukna datu, iake ma’paolai salui tang sala tu pudukna.

¹¹Iatu petimbang sia timbangan tongan lu dio mai PUANG, mintu’ batu timbangan lan kandu’ panggaraganNa duka.

¹²Nakagalli datu umpogau’i tu katangmekaalukan, belanna tete dio kamaloloan nadipabantang tu isungan kapayunganna.

¹³Iatu puduk malambu’ naala penaanna mintu’ datu, iatu tau umpokada tonganna nakamasei.

¹⁴Iatu kare’dekan ara’na datu iamo pesuanna kamatean, apa iatu to kinaa iamo ussa’poi.

¹⁵Iatu arrang lindona datu umpaden katuoan salama’, sia iatu kamasokananna butung to gaun ke palauran undi.

¹⁶Losong ia melona tu unnappa’ kakinaan, na iake unnappa’ bulaan, losong diangga’ tu ullolongan tangnga’ kinaa na ullolongan salaka.

¹⁷Iatu patunna to bulo lollong iamotu untoyangan kalena dio mai kakadakean; sia minda-minda ungkaritutui lalanna, iamo ungkanandai katuoanna.

¹⁸Iatu kamatampoan undoloan kasanggangan sia kamadoan penaa undoloan katobangan.

¹⁹Mandu melo, ke napopengkadionganni tau tu penaanna sisola to bongko, na iatu untaa pangrampa sola to matampo.

²⁰Minda-minda umpalan penaai tu kada iato, la unnappa’ kameloan, ondongpi maupa’ ia tu to umposande’ PUANG.

²¹Iatu to kinaa disangai to unnampui tangnga’ kinaa, sia kada mammi’ umpamatoto’ bisara.

²²Iatu tangnga’ kinaa napokalimbuang katuoan to unnampui, apa iatu tobaga umpoukungan kabaganna.

²³Iatu penaanna to kinaa umpopemmanarang pudukna, sia umpamatoto’ bisara sun dipudukna.

²⁴Iatu kada masokan susito tallo’ enoan, napomatanning penaa sia napopedampi buku.

²⁵Den tu lalan malolo nasanga tau, apa katampakanna mebaa lako kamatean.

²⁶Iatu katangdiaranna to mengkarang ussolanni mengkarang, belanna sadangna umparukui.

²⁷Iatu to bulituk umbo’bok patuang kakadakean, sia dio pudukna susi bang to api ma’durru’.

²⁸Iatu to kelok penaanna umpabu’tu bang kasipakkan, sia iatu to ma’kada boko’ umpasisarak to massangmane.

²⁹Iatu to sa’ga’ unnaran padanna rupa tau, sia ussolanni lako lalan tang melo.

³⁰Minda-minda umpamamma’ matanna morai ma’tangnga’ kelok, sia minda-minda unnammang arena, umpogau’mo kakadakean.

³¹Iatu uban iamo misa’ makota mala’bi’, tu dikabu’tui dio lu lalan kamaloloan.

³²Iatu to kalando pesuka’ ussau’ misa’ to lalong, sia minda-minda untaloi penaanna ussau’ to untalo misa’ kota.

³³Iatu pa’ loterei dirogan-rogan diong bantanan, apa iatu ra’ta’na simisa’-misa’ lu dio mai PUANG.