Read Toraja-Sa'dan SARAMBU PEADA’ 17 Bible Online

SARAMBU PEADA’ 17 - Toraja-Sa'dan bible

SARAMBU PEADA’ 17

¹Mandu melo ia tu bo’bo’ rangke sangraku’, ke naturu’i karapasan, na iatu banua nanii ponno pa’kandeanan, ke naturu’i kasigagan.

²Misa’ kaunan unnampui tangnga’ kinaa la umparenta misa’ pia muane ma’pakasiri’ sia la umpotaa mana’ dio lu mintu’ to massiulu’.

³Iatu pa’paredean dinii umpatama salaka sia po’poran dinii umpatama bulaan, apa PUANG ussudii tu mintu’ penaa.

⁴Iatu to umpogau’ kadake umpalan penaa puduk ma’pakena, sia iatu kakelokan untananni talinga lila ma’kasanggang.

⁵Minda-minda untelle to bongko, umpamatuna Totumampana; sia minda-minda umpoparannu kamandasanna to senga’ tae’ natilendok dio mai ukungan.

⁶Iatu lanto mimi’ napomakota nene’, sia iatu to padadian napomala’bi’ anak.

⁷Iatu kada mandalan tang sitondon to baga, ondong pissan, ke to kapua anna ma’kada buttok.

⁸Iatu pamengan sangtinti parimata maelo lako to umpoapai, la maupa’ umba-umba tu napatu.

⁹Minda-minda ussamboi kapatodotintingan, unnula’ pa’kaboro’; apa minda-minda untundan nenne’ kara-kara, umpasisala to massangmane.

¹⁰Pissanri disayu tu to unnampui tangnga’ kinaa natamamo penaanna, losong na iatu pessaratu’ peta’tan lako to baga.

¹¹Minda-minda tu pabali-bali, kakadakean manna naparri-parri, apa la disua tu pesua tang unnissan kamamasean la ullaoi.

¹²Melo ia tu sitammu beruang birang sisayuran anakna, na iatu sitammu to baga lan kabaganna.

¹³Minda-minda umpakkanni kakadakean tu kameloan, manassa iatu kakadakean tae’ nala toyang dio mai banuanna.

¹⁴Iatu pamulanna kasigagan susito ke ullo’po’ki sapan uai; iamoto torei tu kasigagan, ke tae’ siapi namasarrang.

¹⁵Minda-minda ussanda tonganni to tang mekaaluk sia minda-minda umpasala sia unnukung to malambu’, tau iate sola dua Nakagalli PUANG.

¹⁶Apara gai’na tu pealli lan limanna to baga la naallian kakinaan, belanna inang tae’ naampui tangnga’ kinaa?

¹⁷Misa’ sangmane tontong bang ma’pakaboro’, sia iatu kasiuluran payan lan kapussakan.

¹⁸Minda-minda umpasisala’pa limanna mangallu’ sia unnindo’i indanna padanna tolino, tae’ naampui tangnga’ melo.

¹⁹Minda-minda umporai kasigagan, umporai kapatodo-tintingan; sia minda-minda umpamadao kadanna undaka’ kasanggangan.

²⁰Minda-minda tu leko’ penaanna, tae’ nakabu’tui kamauparan, sia iatu lila ma’pakena tobang rokko kasanggangan.

²¹Minda-minda undadian to baga iamo napomaparri’, naambe’ to baga tang la parannu.

²²Iatu kaparannuan lan penaa umpamadoi’ kamalekean, apa iatu penaa rosso umpamarangke buku.

²³Iatu to tang mekaaluk untarima pamengan lan mai kandu’ la umputa’ lalan katonganan.

²⁴Iatu to unnampui tangnga’ kinaa dio pentioran tu kakinaan, apa iatu mata to baga mettia’-tia’ bang sae lako randan langi’.

²⁵Misa’ pia muane baga naposaki inaa ambe’na, sia napopa’di’ penaa to undadianni.

²⁶Diposala ke undosaki’ to malambu’, ondong pissan tang sipatu ke umbambaki’ to la’bi’.

²⁷Minda-minda unnampui tangnga’ kinaa umpasilolongan melo buangan kadanna, sia iatu to mandalan pa’inaanna ma’timbang melo.

²⁸Moi anna to baga, ke rapa’ siai, disanga to kinaa, sia iake ma’pakappa bangi disanga to unnampui tangnga’ kinaa.