Read Toraja-Sa'dan SARAMBU PEADA’ 18 Bible Online

SARAMBU PEADA’ 18 - Toraja-Sa'dan bible

SARAMBU PEADA’ 18

¹Minda-minda untoyangan kalena iamo unturu’ lalan pa’poraianna, sia karede-redean, unnea mintu’ pa’tangngaran melo.

²Iatu to baga tae’ naporai pa’inaan melo, sangadinna naporai bang untale’ apa diong penaanna.

³Umba-umba nanii sae tu to tang mekaaluk, inde dukato nanii sae tu kadipamatunan, sia kapassayuan naturu’ siri’.

⁴Iatu kada sun dio pudukna misa’ tau susito uai mandalan, sia salu’-salu’ tikula’dak-la’dak sia kalimbuang umpabu’tu kakinaan.

⁵Iake umpalosongangki’ to tang mekaaluk sia ussualeki’ to malambu’, ke ma’paolai saluki’ manassa salaki’.

⁶Iatu pudukna to baga umpaden kasigagan, sia iatu sadangna umpetamban kadibamban.

⁷Iatu sadangna to baga iamo umbaai lako kasanggangan, sia iatu pudukna umpoya kalena.

⁸Iatu kadanna to ma’kada boko’ susito kande marasa, tang tigaruntu lendu’ tama inan penaa.

⁹Iatu to tukkunan mengkarang, massiulu’mo to pasanggang.

¹⁰Iatu sanganNa PUANG sangtinti to menara matoto’; iatu to malambu’ mallai lako natang matumba-tumba dio.

¹¹Iatu iananna to sugi’ napokota matoto’ sia napobenteng tembo’ matande nasanga.

¹²Iatu kamadaoan penaanna tau undoloan katobangan, apa iatu kamadiongan penaa undoloan kadipangkeran.

¹³Minda-minda mebali dolo namane ma’perangii napobaga sia naposayuan.

¹⁴Iatu kabattaranna tau ussande’i lan kamaparrisanna, apa iatu penaa bonnong mindara la umpakatanai?

¹⁵Iatu penaanna to unnampui tangnga’ kinaa, ungkabu’tui kapaissanan, sia iatu talinganna to kinaa undaka’ kapaissanan.

¹⁶Iatu pamengan napa’bengan tau umpakalua’ lalanna sia umpopennoloi dio olona to kapua.

¹⁷Iake den kasikara-karan ditonganni tu to ma’kada dolo, apa undinna ma’kadaomi tu balinna sia umpebalii tu kadanna.

¹⁸Iatu pa’loterei untorei kasigagan sia umpasisarak to paa.

¹⁹Iatu siulu’ tang taben katongananna tang tatamamo tu penaanna losong na iatu kota ditambakuku, sia iatu kasigagan susimo salli’ babangan benteng.

²⁰Iatu bua kadanna tau napodia’ tambukna; sia napedia’i bura pudukna.

²¹Iatu kamatean sia katuoan lan kuasanna lila, minda-minda unturusanni la nakande tu buanna.

²²Minda-minda umpobainemo misa’ baine, iamo ungkabu’tui ianan ballo, sia unnappa’ kamaturu-turuan dio mai PUANG.

²³Ma’kada mengkamoya-moya tu to bongko, apa iatu to sugi’ mebali to’do’.

²⁴Iatu to buda punala bangri tau naposola naposanggang, apa den duka sipissan na iatu sangmane, maruru’ sia marengke’ tongan, na iatu siulu’.