Read Toraja-Sa'dan SARAMBU PEADA’ 2 Bible Online

SARAMBU PEADA’ 2 - Toraja-Sa'dan bible

SARAMBU PEADA’ 2

¹E anakku, iammu tarimai tu kadangku sia umpariba’tengi tu pepasanku,

²naurunganni narangi talingammu tu kakinaan sia mupopa’mirringan tu penaammu lako tangnga’ melo,

³ondongpi, iake metambako lako pakita penaa sia meongli’ lako tangnga’ kinaa;

⁴iake mudaka’i susi salaka sia musisik susi ianan membuni,

⁵manassa la mutandai tu diona ungkataku’ PUANG sia unnappa’ kapaissanan diona Puang Matua.

⁶Belanna PUANG Ia tu umpa’kamasean kakinaan, lan mai pudukNa nanii tassu’ tu kapaissanan sia tangnga’ kinaa.

⁷Ia umparandananni pa’tunduan tu to bulo lollong, sia Ia napobalulang minda-minda tu to lolang tae’ sayuanna.

⁸Ia ungkampai tu mintu’ lalan katonganan sia urrinding pala’ lalanna to Nakamasei.

⁹Attu iato la mutandai tu kamaloloan sia tonganna, sia ia duka tu kamalamburan sia mintu’ lalan melo.

¹⁰Belanna iatu kakinaan la tama penaammu sia iatu kapaissanan la napomanaman deatammu.

¹¹Pa’timbang melo la ungkaduttu’ko, tangnga’ melo la urrinding pala’ko,

¹²anna rampanangko dio mai lalan kadake, sia dio mai to ma’kada leko’,

¹³dio mai tu to untampe lalan malolo, la unturu’ lalan mapittuk;

¹⁴tu parannu umpogau’ kadakena, sia unnarrak diona gau’ ma’bulang leko’, tu umpabu’tu kadake,

¹⁵tu ma’lekko-lekko lalanna sia unnola lalanna tu umpapusai,

¹⁶anna rampanangko dio mai baine to senga’, dio mai baine, tu tang ditandai tu ma’kada massede,

¹⁷tu untampemo muanena tonna mangurapa sia tang ungkilalaimo basse Kapenombanna;

¹⁸belanna iatu banuanna solo’ rokko kamatean, sia mintu’ lalanna ma’palulako to’bombo tomate.

¹⁹Moi misa’ tu mintu’ to male lako, tae’mo sule, sia tae’mo nalambi’ lalan katuoan.

²⁰Ammu turu’ batattana to melo sia ungkaritutui lalanna to malambu’.

²¹Belanna iatu bulo lollong la untorroi tondok sia iatu to masallo’ la mareso’ lan,

²²apa iatu mintu’ to tang mekaaluk la disabu’i lan mai tondok sia iatu mintu’ to tang maruru’ la ditorakki lan mai.