Read Toraja-Sa'dan SARAMBU PEADA’ 20 Bible Online

SARAMBU PEADA’ 20 - Toraja-Sa'dan bible

SARAMBU PEADA’ 20

¹Iatu anggoro’ sangtinti to patelle-telle sia iatu melangona ke diiru’i mongngo’ bang, minda-minda unturusanni tae’ nakinaa.

²Iatu pa’garrakna datu susito burrungna singa mangura, minda-minda untengkai, tang ungkatirinnai katuoanna.

³Iamo napomala’bi’ misa’ tau, ke toyangi dio mai kasigagan, apa minda-minda tu baga ta’pa re’dek bang ara’na.

⁴Iake attu lakoan padang iatu to tukkunan noka ia lao ma’tengko, iamoto ianna undaka’ bura padang, ke attu pegandungan, tae’ apa nakabu’tui.

⁵Iatu tanan penaanna tau lan ba’tengna susito uai mandalan, apa iatu to unnampui tangnga’ kinaa, manarang duka umpatassu’i diong mai malikunna.

⁶Buda tu tau umpudi kalena kamasokananna, apa iatu to matappa’, mindara ma’din ullambi’i?

⁷Iatu to malambu’ ma’gau’ malolo la maupa’ tu mintu’ anakna undinna.

⁸Misa’ datu tu unnisung dao kadera pa’paolaian salu, matanna bangsia umpasilaenanni tu kadake na melo.

⁹Mindara ma’din ma’kada, kumua: Mangkamo kukampai tu penaangku anna masero, sia maseromo’ dio mai kasalan?

¹⁰Duang rupa tu batu timbangan sia duang rupa tu sukaran, iatu apa iato Nakagalli dua PUANG.

¹¹Moi anna pia muanepa, apa penggauranna umpamanassai, kumua masero sia maloloraka tu kedona.

¹²Iatu talinga parangi sia iatu mata patiro; mangka duamo Natampa PUANG.

¹³Da mubudananni tu mamma’ bang, da mumakasi-asi, palessekki tu matammu, anna silasa tu kandemu.

¹⁴Kadake!, kadake!, kadanna tu to mangalli, apa ianna malemo, massattuammi umpudi kalena.

¹⁵Moi naampui tau tu bulaan sia unnampui buda merdan, iatu ianan ballo tongan, iamotu puduk ma’kada kinaa.

¹⁶Alami tu bayu lamba’na, belanna iamo unnindo’i indanna to senga’, sia alami ammu potosandangi ussondai tu to tang ditandai.

¹⁷Iatu roti napabu’tu pa’pakena matappa’ nakande tau, apa undinna iatu sadangna naponnoi karassik.

¹⁸Mintu’ tanan penaa dipalalo tete dio pa’timbangan, iamoto timbang melomi mumane lao parari.

¹⁹Minda-minda lu lako lu dio mai ma’pakadake lele, iamo umpasombo rasia, iamoto da musikadamak tu to sangkaloloan bang.

²⁰Minda-minda untampakki ropu ambe’na sola indo’na, la pa’de tu sulona, ke lillinan parrakki.

²¹Iatu mana’ disasai diala, manassa tae’ namarendeng katampakanna.

²²Da muma’kada kumua: la kupabala’i tu kakadakean, sangadinna kampai tu PUANG, na Iamora untunduiko.

²³Duang rupa tu batu timbangan Nakagalli PUANG, sia misa’ tu timbangan sala, iamo kadake tongan.

²⁴Lu dio mai PUANG tu mintu’ tengkana tau, apa iatu misa’ tau-umba nakua la untandai tu la lanna?

²⁵Iake ma’kadai tu tau, kumua: maindan, natae’ natangnga’ meloi dolo, iamo misa’ poya lako kalena, sia iake mangallonanni dolo, namane ma’timbang.

²⁶Iatu misa’ datu kinaa unta’pii to tang mekaaluk, sia napalullu’i roda panglulluran.

²⁷Iatu penaanna tau iamo misa’ palita lu dio mai PUANG, la umparessai tu mintu’ apa karerungan lan ba’tengta.

²⁸Kamamasean sia kamarurusan ungkarimmanni datu, sia tete dio kamamasean anna pabantangi tu isungan kapayunganna.

²⁹Iatu belona to mangura iamotu kamatotoranna, sia iatu kamala’biranna to matua, iamotu uban.

³⁰Iatu lalan pebamba kerara usseroi kakadakean, sia iatu pelonga’ umbasei tu apa karerungan lan penaa.