Read Toraja-Sa'dan SARAMBU PEADA’ 21 Bible Online

SARAMBU PEADA’ 21 - Toraja-Sa'dan bible

SARAMBU PEADA’ 21

¹Iatu penaanna datu lan limanNa PUANG susito salu’-salu’, Napalolong lao umba-umba tu Naporai.

²Iatu mintu’ lalanna tau nasanga malolo dio pentirona, apa PUANG ussudii tu penaa.

³Umpogau’ kamaloloan sia salunna mandu naala penaanNa PUANG na iatu pemala’.

⁴Iatu mata pasoloran sia penaa madao, iamo parrangna to tang mekaaluk, iamora dipokasalan to.

⁵Iatu pa’inaanna to birisan umpaden kaseboan, apa minda-minda tu sasa-sasa bang lan kapu’duran.

⁶Iake urrampunki’ ianan tete dio lila ma’pakena, susito gaun titale’ sia susi poya mebaa lako kamatean.

⁷Iatu penggauran masa’ga’na to tang mekaaluk urriu’ bangi male, belanna manokamo tu tau iato umpogau’ tonganna.

⁸Iatu lalanna to ma’pakena tilekko-lekko, apa iatu to bulo lollong malolo tu penggauranna.

⁹Mandu melo untorroi tetuk soto banua na iatu sisola baine te’geran lan banua.

¹⁰Iatu penaanna to tang mekaaluk ungkabarii bang kadakena, sia tae’ natandai ungkamasei padanna rupa tau.

¹¹Iake diukungi tu to pabe’se, la kinaa tu to tang unnampui tangnga’ melo; sia iake to kinaa diada’i, la unnappa’ kapaissanan.

¹²To malambu’ umpenunu a’gan banuanna to tang mekaaluk sia ussanggangi tu mai to tang mekaaluk.

¹³Minda-minda ussissinganni talinga tu pengkamoyana to bongko, manassa iake ia metamba tae’ tau umpebalii.

¹⁴Iatu pamengan dibuni umparapa’ kasengkean, sia iatu pa’kamase natambuk umpa’dei kare’dekan ara’.

¹⁵Iatu umpogau’ tonganna, napoparannu to malambu’, apa napotiramban tu umpogau’ kakelokan.

¹⁶Iatu to pusa dio mai lalan tangnga’ kinaa la melayo lan kasirampunan bombo tomate.

¹⁷Minda-minda umporai bangi ma’marua’-rua’, la kapu’duran; sia minda-minda umbudanan minna’ sia uai anggoro’, tae’ nala sugi’.

¹⁸Iatu to tang mekaaluk napopela’bak to malambu’ sia iatu to tang maruru’ ussonda to bulo lollong.

¹⁹Mandu melo tu untorroi padang pangallaran na iatu sisola misa’ baine te’geran sia sengkean.

²⁰Lan banuanna to kinaa denmo tu mai ianan dinanna sia minna’, apa misa’ to baga untabu-tabui.

²¹Minda-minda unnula’ kamaloloan sia kamamasean, la unnappa’ katuoan, kamaloloan sia kadipangkeran.

²²Iatu to kinaa unteka’ kota ditambakukunna to lalong sia natuan tu benteng naposanderan.

²³Minda-minda ungkanandai pudukna sia lilana, iamo ungkampai kalena dio mai ma’rupa-rupa kapussakan.

²⁴Iatu to rombo’ sia matampo, disanga to patelle-telle, iamotu to matampo liu penggauranna.

²⁵Iatu kamailuanna to tukkunan umbaai lako kamatean, belanna iatu limanna magasa mengkarang.

²⁶Iatu kamailuan mailu bang situ’turan allo, apa iatu to malambu’ mamengan bang sia tang ungkasayangi apanna.

²⁷Iatu pemala’na to tang mekaaluk iamo misa’ kamagallian, ondong pole’ ke napemalaranni situang tangnga’ kadake.

²⁸Iatu to sa’bi tang tongan la sanggang, apa iatu to ma’perangi, ditonganan ke ma’kadai.

²⁹Iatu to tang mekaaluk ma’lindo batu, apa iatu to bulo lollong umpamanassa tongan lalanna.

³⁰Tae’ tu kakinaan sia tae’ tu tangnga’ kinaa, tae’ duka tu bisara, ke umpennoloiki’ PUANG.

³¹Iatu darang dipasakka’, ke allo kapararian, apa iatu kapataloan lu dio mai PUANG.