Read Toraja-Sa'dan SARAMBU PEADA’ 23 Bible Online

SARAMBU PEADA’ 23 - Toraja-Sa'dan bible

SARAMBU PEADA’ 23

¹Iake unno’ko’ko kumande sola misa’ pangulu, ia manna mutiro melo tu diona tingayomu.

²Sia pandanni piso tu barokomu, ke misa’ko to soko.

³Da mukaduangi tu kande mammi’na, belanna iamo kande mepakena.

⁴Da mubo’yo’i kalemu la morai sugi’, pamambelai tu pa’inaan iato.

⁵Iake mupenunui, simpolo pa’de, belanna ta’pa unggaragan kalena pani’, susito langkan maega mettia’ langngan langi’.

⁶Da mukandei tu kande to ma’mata pasisik, da mukaduangi tu kande mammi’na

⁷belanna susito ma’inaa lanna bang lu, susimoto tu a’ganna; kumandemoko sia mangiru’ko!, kadanna lako kalemu, apa iatu penaanna mambela dio mai kalemu.

⁸Iatu kande musuak, tu muamma’mo, la mulua sule, sia iatu kada masokanmu mupokada punala bang.

⁹Da muma’kada dio pa’peranginna to baga, belanna nasayu tu kada tonganmu.

¹⁰Da mupalelei tu katonan dolo sia da mulambanni tu pa’lakna pia biung.

¹¹Belanna iatu Tomangla’bakna matoto’; sia la Napebalii tu kara-kara unneako.

¹²Papatui penaammu tu pa’pakilala sia patananni talingammu tu kada tongan.

¹³Da mupadapai tu peada’ lako pia muane; iake mubambai pebamba, tae’ nala mate.

¹⁴Moi ammu bambai pebamba, apa murampanan tu sunga’na dio mai lino tomate.

¹⁵E anakku muane, iake kinaai tu penaammu, manassa ia duka tu penaangku la parannu.

¹⁶Iatu mintu’ apa lan ba’tengku la sila’tekan, ke ussa’bu’i tonganna tu pudukmu.

¹⁷Da nakimburui penaammu tu to umpogau’ kasalan, sangadinna birisanko la tontong ungkataku’, PUANG,

¹⁸iake susito, manassa la sae tu attu melo, sia tae’ mula ka’tu rannu.

¹⁹Ma’perangiko, e anakku muane, ammu kinaa, patu’tunni tupenaammu lako lalan tongan.

²⁰Da musikadamak tu to pangiru’ uai anggoro’ sia to pa’duku’.

²¹Belanna iatu to pangiru’ sia to pa’kande la kalala’ sia iatu to pa’tingkaru’dusan umpopake sare dodo.

²²Perangii tu kadanna ambe’mu tu mangka undadiangko, sia da musayui tu indo’mu, ke matuami.

²³Alli tu kamanapparan sia da mubaluk pole’i, sia kakinaan, pa’pakilala sia tangnga’ kinaa.

²⁴Iatu ambe’na to malambu’ la parannu tongan, minda-minda undadian pia kinaa la naposende.

²⁵Iamoto anna parannu penaanna tu ambe’mu sia indo’mu, sia anna sende tu to undadiangko.

²⁶E anakku, sorongi tu penaammu lako kaleku, sia la naposende matammu tu diona lalanku.

²⁷Belanna iatu baine bualang susito kalo’tok mandalan, sia baine passulo bongian susito patuang si’pi’.

²⁸Ondongpi, mangodo’ susito pa’gora’ sia umpakerangngan to tang maruru’ dio lu torro tolino.

²⁹Mindara tu nanii pa’dikka’? mindara tu nanii pekaindo’? mindara tu nanii kasigagan? mindara tu nanii kasumarroan? mindara tu nanii bangke punala bang? mindara tu nanii mata maru’gun?

³⁰Dio lu to masai bongi bangmo unno’ko’ mangiru’ uai anggoro’, iamotu to sae ullae’ uai anggoro’ dipasito’bo’.

³¹Da mutiroi tu uai anggoro’, ke mararang tonganni, sia iake pamburorongi lan irusan, tarru’ liu bang diamma’.

³²Katampakanna ma’totok susito ula’, sia umpessumpiran ipona ten to ula’ rame.

³³Iake susito, iatu matammu untiro ma’rupa-rupa apa memangngan, sia tang ma’runduanan tu penaammu muma’damolang.

³⁴Sia la susiko to mamma’ lan atena tasik, sia sangtintiko to matindo dao tampak lentong kappala’.

³⁵Nabambana’ tau, apa tae’ kusa’ding mapa’di’, nabobo’na, apa tae’ kusa’dinganni; pirampira kula pandiu? Manassa la kudaka’ pole’pa.