Read Toraja-Sa'dan SARAMBU PEADA’ 24 Bible Online

SARAMBU PEADA’ 24 - Toraja-Sa'dan bible

SARAMBU PEADA’ 24

¹Da mukimburui tu to kadake sia da muporai la ussisolanni,

²belanna iatu penaanna untangnga’ bang pa’pakario-rio, sia iatu pudukna umpokada bang kamandasan.

³Tete dio kakinaan nadibangun tu misa’ banua, sia tete dio tangnga’ melo nadipabantang;

⁴tete dio kapaissanan nadiponnoi tu mai bilikna ianan keangga’ sia maballo sanda rupanna.

⁵Iatu to kinaa matoto’, sia iatu to unnampui kapaissanan umpasombo kamawatangan.

⁶Belanna sipatuko la parari situang pa’timbangan, sia iatu kapataloan napaden kabudanna to ma’bisara.

⁷Iatu to baga tae’ nalambi’i tu kakinaan; tae’na tiku’bi’ tu pudukna lan to’ babangan.

⁸Minda-minda tu matangnga’ bang la umpogau’ kadake, iamo digente’ to bulituk.

⁹Iatu tangnga’ tang kebattuan, iamo kasalan, sia iatu to pabe’se nakagalli tau.

¹⁰Iake raangi penaammu lan attu kapussakan, la moro’ tu kamatotorammu.

¹¹Rampananni tu to ditingkan la dipatei, sia da mutoyangan kalemu dio mai tu to tipa’re’ba len la dipongko.

¹²Iake ma’kadako mukua: Manassa tae’ kiissanni — tae’raka nala sombo lako Puang tu ussudi mintu’ penaa sia tae’raka Nala untandai Puang, tu umpenunu ba’tengmu sia tae’raka Nala umpabala’i tu penggauranna simisa’-misa’ tau?

¹³Kandei tu tani’ enoan, e anakku muane, belanna melo tu iannato, sia iatu tallo’ merang matappa’ lan lingaromu.

¹⁴La mutandai kumua susi dukato tu kakinaan lan penaammu. Iake mukabu’tuimi, manassa la sae tu kameloan undinna, sia iatu pa’rannuanammu tae’ nala ka’tu.

¹⁵E kamu, to tang mekaaluk, da miodo’i tu banuanna to malambu’, sia da misanggangi tu inan katorroanna.

¹⁶Belanna iatu to malambu’ moi anna tobang pempitu, la bendan duka sule, apa iatu to tang mekaaluk tipessussuk tama kamandasan.

¹⁷Iake tobangi tu ualimmu, da muparannu; iake tipessusukki, da nasende penaammu,

¹⁸dikua da Natiroi PUANG, anNa tae’ naalai penaanNa, Naurunganni umpalelei tu kasengkeanNa dio mai.

¹⁹Da mukagi’gi’i tu to kadake, sia da duka mukimburui tu to tang mekaaluk;

²⁰belanna tae’ nala sae tu kameloanna undinna lako to kadake, sia iatu palitanna to tang mekaaluk la dipa’dei.

²¹E anakku muane, kataku’i tu PUANG sola datu, sia da musisola tu tau umpaden kamarukkan.

²²Belanna tang dikapang-kapang anna bu’tu tu kasangganganna, sia mindara unnissanni ba’tumba natappu’ tu taunna narampoi kamandasan.

²³Inde dukapa tu ba’tu pira-pira (kada peada’na) to kinaa. Tang melo tu umpelindo tau lan kapa’paolaian salu.

²⁴Minda-minda tu ma’kada lako tu umpogau’ kadakena, kumua: Tae’ musala, nagatai mintu’ bangsa sia la natampakki ropu to sangpetayanan.

²⁵Apa minda-minda ma’paolai salu tongan la maupa’, sia la narampoi kamasakkean sia kasalamaran tu tau iato.

²⁶Minda-minda mebali tongan, iamo unnudung pudukna tau.

²⁷Posara’i dolo tu pengkaranganmu dio salian sia pasakkaranni kalemu tu pa’pa’lakan, mumane umpabendan banua.

²⁸Da musa’bi tang kebattuan lako padammu tolino, belanna la morairokoka umpatassu’i dio pudukmu tu kamorang-morang?

²⁹Da muma’kada kumua: Susitu nagauranna’ susi dukato tu la kugauranni; la pantan kupabala’i sitinaya penggauranna.

³⁰Den pissan kulendu’i pa’lak to tukkunan sia ullendu’i pa’lak anggoro’ to tang unnampui tangnga’ kinaa.

³¹Manassa pa’lak iato nasitutu’i duri sia nasamboi riu, sia iatu rinding tembo’na puramo tuan.

³²Iatongku pemarangami, kupalan penaami, sia iatongku tiromi, kualami pangadaran tu iannato.

³³La mamma’pa’ sattu’, mamma’-mamma’pa’ sattu’, la ma’koko kalepakpa’ umbambangan kaleku sattu’,

³⁴la saemo madomi’ tu kamakario-rioammu sia iatu kataerammu susi misa’ to ma’pa’buno.