Read Toraja-Sa'dan SARAMBU PEADA’ 25 Bible Online

SARAMBU PEADA’ 25 - Toraja-Sa'dan bible

SARAMBU PEADA’ 25

¹Inde dukapa tu peada’ dandanan sangka’na Salomo, tu narampun taunna Hizkia, datu Yehuda.

²Iamo Napomala’bi Puang Matua tu umbuni apa Napogau’, apa iatu napomala’bi’ datu iamotu umparessa kara-kara.

³Iatu malangka’na langi’, sia iatu mandalanna lipu daenan sia iatu penaanna datu tang dilambi’ disuka’.

⁴Alai tu tai salaka, anna bu’tu natiro pande bulaan tu misa’ panggaraganna.

⁵Pamambelai tu to tang mekaaluk dio mai olona datu, na iatu isungan kapayunganna dipabantang tete dio kamaloloan.

⁶Da mutendeng kalemu dio olona datu, sia da mubendan dio inanna to kapua.

⁷Belanna mandu melo, kema’kadai tau lako kalemu, nakua: Maleko mai, kendekko langngan!, na iake napamadiongangko tau dio olona to mala’bi’, tu mangka nata’pai matammu.

⁸Da mumadomi’ male ma’kara-kara, belanna apa tu la mupogau’ ma’katampakanna ke napakasiri’ko padammu tolino?

⁹Pemeloi kalena bangmi tu kara-karamu sola padammu tolino, apa iatu rasia to senga’ da mupasomboi,

¹⁰da nabe’seko minda-minda urrangi tu iannato; ianna susito, tae’ nala tore tu lele kadakemu.

¹¹Iatu kada disa’bu’ melo butung bua appel bulaan dipadiong pindan salaka.

¹²Iatu to ma’pakilala kinaa siperangian to untananni talinga susito anting-anting bulaan sielle’ manik bulaan.

¹³Susitu masakka’na ambun makko, ke attu pegandungan, susi dukamoto tu misa’ pesua manappa’ lako tu ussuai, belanna iamo umpamanaman penaanna puangna.

¹⁴Susito salebu’ sia angin tang umbaa uran, susi dukato tu misa’ tau untendeng pamenganna tu tae’ gai’na.

¹⁵Diona pesuka’ kalando anna dipamalamma’ penaanna tu to paa, sia lila masokan unnisak-nisak buku.

¹⁶Iake muappa’i tu tani’ enoan, kande bangi silasanna, da mupeko’sai, mulua manii sule.

¹⁷Da mumadada’ bang lao lako banuanna padammu tolino, masorro manii, anna kabiri’ko.

¹⁸Susitu misa’ tarasulu’, pa’dang sia tinaran matata’, susi dukato tu misa’ sa’bi tang tongan lako padanna tolino.

¹⁹Susitu isi manapo sia lentek tiredok len susi dukamoto ke sande’ lakoki’ to tang manappa’ lan allo kapussakan.

²⁰Susi to unnalai bayunna, ke attu madingin, sia susi to sukka dipasirau soda, susi dukato tu to sumengo punala bang, moi anna rosso penaanna.

²¹Iake tangdia’i tu ualimmu pakandei, iake ma’rangi pairu’i.

²²Belanna ke mupogau’i susito, mupabumbunni ruaya tu ulunna, anna PUANG la umpakkanni lako kalemu.

²³Iatu angin ma’paludaa mai umbaa uran kamban, susi dukato tu kada boko’ umpapayan kasengkean dio lindona tau.

²⁴Mandu melo untorroi tetuk soto banua, na iatu sisola baine te’geran lan banua.

²⁵Iatu kareba melo dio mai tondok mambela butung to uai sakka’ lako to ma’rang.

²⁶Susi uai saruran dipamalutu sia uai kalimbuang dipamaruttak, susi dukamoto tu to malambu’ ungkalaa’ to tang mekaaluk.

²⁷Kadake ke budai tani’ enoan dikande, apa iatu untuntun kara-kara magasa tongan iamo umpabu’tu kadipangkeran.

²⁸Susi kota tuan rinding tembo’na, susi dukamoto tu misa’ to tang unnatta penaanna.