Read Toraja-Sa'dan SARAMBU PEADA’ 26 Bible Online

SARAMBU PEADA’ 26 - Toraja-Sa'dan bible

SARAMBU PEADA’ 26

¹Susi ambun makko ke pealloanni, sia uran ke pegandunganni, susi dukato tu kadipangkeran lako tobaga.

²Susito dena’ mettia’ lu lako lu dio mai sia susi kaluppini’ male bang mettia’, susi dukato tu tampak ropu dipokada punala bang, tang la umbasa tau.

³Iatu ue dibamban darang, iatu sanga’ disangaran keledai na iatu pebamba dipadio boko’na tobaga.

⁴Da mupebalii to tobaga sitinaya kabaganna, da mususitu tau iato.

⁵Pebalii tu tobaga sitinaya kabaganna da nasangai kinaa tu kalena.

⁶Minda-minda umpa’pea kareba tete dio tobaga, susito unta’takki lette’na sia susito unniru’ apa parasun.

⁷Susito kupi’ kope lentekna susi dukato tu kada peada’ sun dipudukna tobaga.

⁸Susitu to umpori manda’ batu lan pekolak, susi dukato tu to umpakaraya to baga.

⁹Susitu duri untossok limanna to malango, susi dukato tu kada peada’ sun dipudukna tobaga.

¹⁰Susito ma’pana punala bang urrua mintu’ to lendu’ lalan, susi dukato tu to umpopa’diama tobaga sia to pa’malangoan.

¹¹Iatu tobaga tu ma’tole-tole umpokada kabaganna, susito asu sule ungkande luana.

¹²Iake mutiroi tu misa’ to ussanga kalena tokinaa, manassa iatu tobaga mandu dirannuan na iatu tau iato.

¹³Ma’kada tu to tukkunan nakua: Den olo’-olo’ masuru dio lu lalan! sia den singa dio lu batatta!

¹⁴Susitu ba’ba tilento-lento dio to’ engsel, susi dukato tu to tukkunan diong kamammaranna.

¹⁵Iatu to tukkunan umpadiong bang kandian limanna, apa matukkun siapa unnangka’ limanna ma’suak.

¹⁶Iatu tu tukkunan ussanga kalena mandu kinaa na iatu pitu to umpebalii kada tongan.

¹⁷Minda-minda tu untamai kasigagan tang umpatu kalena, susi tu tau untoe talinga asu lendu’ lalan.

¹⁸Susito bomboan umpa’panan anak pana nanii api sia umpassumpiran tinaran papatean,

¹⁹susi dukato tu to umpakena padanna tolino sia ma’kada nakua: Maningo-ningo bangra’ aku.

²⁰Iake tae’i kayu, pa’de tu api; umba-umba tu tae’ nanii to ma’kada boko’, rapa’ tu kasigagan.

²¹Susi ruaya umpopa’lana-lana dukkunna sia kayu umpopa’lantang-lantang api, susi dukato tu to passigagan umpabu’tu kasiualian.

²²Iatu kadanna to ma’kada boko’ susito kande marasa, tang tigaruntu lendu’ tama ba’teng.

²³Susitu bibang disapu’ salaka, susi dukato tu puduk dukku-dukku umpokada kamamaliran, apa kadake tu penaa.

²⁴Minda-minda tu untambuk essun, belo puduk punala bang, apa untannun pa’pakkena lan ba’tengna.

²⁵Moi anna ma’kada masokan, da mupatonganni, belanna pitu tu apa megallian naparitambuk.

²⁶Moi anna membuni tu kamagi’giran tete dio pa’pakena, iatu kadakena sombo lan kasirampunan.

²⁷Minda-minda umbo’bokan patuang tau, ia kalena la tobang rokko, sia minda-minda ullolinni batu tau, la nalolinni sule tu kalena.

²⁸Iatu lila kamorang-morang ungkabiri’ to naroso, sia iatu puduk mammi’ umpasakka’ kasanggangan.