Read Toraja-Sa'dan SARAMBU PEADA’ 27 Bible Online

SARAMBU PEADA’ 27 - Toraja-Sa'dan bible

SARAMBU PEADA’ 27

¹Da mumassattuan diona tu allo masiang, belanna tae’ mutandai apa tu ma’din napabu’tu allo iato.

²Melo ke to senga’ umpudiko, da napudukmu kalena, sia totama sae, da nakalemu ma’pudi.

³Iatu batu magasa sia iatu karassik mabanda’, apa iatu saki inaa napabu’tu to baga mandu magasa na iatu apa sola duai.

⁴Masarrang tu kare’dekan ara’na tau sia nakabu’ kasengkeanna, apa iatu kamangimburuanna minda la unnattai?

⁵Iatu peada’ dipasombo mandu melo na iatu kamamasean dibuni.

⁶Iake bangkeki’ nabamba sangmaneta, malolo tu penggauran iato, apa iatu pangudungna uali moi mekabu’ tae’ duka natongan.

⁷Iatu to dia’ nalullu’mo tu tani’ enoan, apa iatu to tangdia’ moi apa mapai’ matanning duka nasa’ding.

⁸Susito manuk-manuk salamba salao sikambela serangna, susi duka tu to salamba salao sikambela tondokna.

⁹Iatu minna’ sia pandere’ umpamanaman penaanna tau, susi dukato tu kasisangmanean lantuk diona pa’pakilala malolo.

¹⁰Da mutampei tu sangmanemu sia sangmanena ambe’mu, apa da mulese banuanna siulu’mu, ke naruako kamandasan. Mandu melo tu sangbanua mandappi’ na iatu misa’ siulu’ mambela.

¹¹La kinaako, e anakku muane, sia paparannui tu penaangku, angku pebalii tu minda-minda ussayuna’.

¹²Iatu to manarang, ke natiroi tu kamandasan, male umpentilindungan kalena, apa iatu to tang unnampui tangnga’ melo umpatarru’ bang pa’inaanna anna ruai kamandasan.

¹³Alami tu bayu lamba’na, belanna iamo unnindo’i indanna to senga’, sia alami ammu potosandangi ussondai tu baine tang ditandai.

¹⁴Minda-minda tu mela’bik sae massalama’ lako padanna tolino anna umpekapuai gamaranna, nasanga tau susi bang to sae unggatai tu tau iato.

¹⁵Iatu papa rutu’ ke uran kambanni namisa’ baine passigagan pada-pada bang to tu a’ganna.

¹⁶Minda-minda morai umparadanni, susito umparadan angin, sia lima kananna susitu la untangke minna’.

¹⁷Iatu bassi umpamataran bassi, susi duka tu tau umpamataran to senga’.

¹⁸Minda-minda ungkaduttu’ garonto’ ara, la nakande tu buanna, minda-minda ungkaritutui apanna puangna, la dipakaraya.

¹⁹Susitu uai nanii ussamminni lindona tau, susi dukato tu penaanna nanii umpeanni a’ganna.

²⁰Iatu lino tomate sia bambana mukkun tae’ bang la mosona, susi dukamo tang mosona tu matanna tau.

²¹Iatu pa’paredean dinii umpatama salaka sia dapo’ dinii umpatama bulaan, na iatu tau disudi situru’ lelena sanganna.

²²Moi anna dilambuk tu to baga sola pare lan issong, inang tae’ nala sisarak tu kabaganna.

²³Tiro meloi tu mintu’ bembe’mu sia palan penaai tu dombamu ma’ba- anan.

²⁴Belanna iatu ianan tae’ namarendeng; tontongraka tu makota nasiosso’i tau?

²⁵Iake pu’pu’mi tu riu sia mellolo sule sia dirampunmo tu apa tuo dao buntu,

²⁶attu iato iatu anak domba la umpadenangko pakean sia iatu bembe’ laki la mupangallian misa’ pa’lak,

²⁷sia la silasa tu pangandu’ bembe’ la mukande sia nakande to lan banuammu, sia la napotuo mintu’ ruranammu baine.