Read Toraja-Sa'dan SARAMBU PEADA’ 28 Bible Online

SARAMBU PEADA’ 28 - Toraja-Sa'dan bible

SARAMBU PEADA’ 28

¹Iatu to tang mekaaluk male mallai, moi tae’ tau unnula’i, apa iatu to malambu’ manaman bang nasa’ding susito singa mangura.

²Iake pabali-balii tu pa’tondokan, la buda tu arungna, apa tete dio tau unnampui pakita penaa sia tangnga’ kinaa, nanii marendeng tu atoran malambu’.

³Iatu to kalala’, tu umpakario-rio to bongko, susi bang uran kamban sae ussoloi kande.

⁴Iatu to umboko’i sukaran aluk, umpudi to tang mekaaluk, apa minda-minda ungkaritutui sukaran aluk napomatana’ tu tau iato.

⁵Iatu to kadake tae’ natandai tu malolona, apa minda-minda undaka’ PUANG natandai nasang.

⁶Iatu to kalala’ unnola malolo mandu melo na iatu to kelok lalanna, moi anna sugi’.

⁷Minda-minda tu ungkaritutui sukaran aluk, iamo misa’ pia muane unnampui tangnga’ kinaa, apa minda-minda tu sisola passolle’, umpakasiri’ ambe’na.

⁸Minda-minda tu urranganni iananna medenne’ doi’ sia mesaro la’da’, umpangrampunan to uangkamasei tobongko.

⁹Minda-minda umpasalai talinga sia manoka umperangii sukaran aluk, moi passambayangna megallian duka.

¹⁰Minda-minda umpapusa to bulo lollong lako lalan kamandasan, ia kalena la tobang tama patuangna, apa iatu to sallo’ la umpomana’ kamauparan.

¹¹Misa’ to sugi’ ussanga kalena kinaa, apa misa’ to kalala’ tu unnampui tangnga’ kinaa tarru’ natandai tu penaanna.

¹²Iake sila’tekanni tu to malambu’, iamoto tu kamala’biran kapua, apa iake unnappa’i kuasa tu to tang mekaaluk, membuni nasang tu tau.

¹³Minda-minda tu ussamboi kapatodo-tintinganna, tae’ nala maupa’, apa minda-minda unnakui sia umboko’i la ungkabu’tui kamaturu-turuan.

¹⁴Maupa’ tu to tontong mataku’, apa minda-minda tu umpamakarra’ penaanna, la tobang rokko kamandasan.

¹⁵Susi singa umburrung sia susi beruang tangdia’, susi dukamo a’ganna to tu pangulu tang mekaaluk umparenta misa’ bangsa malamma’.

¹⁶Iatu misa’ datu tang palambi’ pa’inaanna, umpakario-rio tongan tau, apa minda-minda ungkabiri’ saro bu’tu kadake iamo umpamalambe’ sunga’na.

¹⁷Iatu tau untanggungi rarana tau tu napatibollo, la mallai sae lako panglamunan; da nadampai tau.

¹⁸Minda-minda tu unnola malolo, la dilendokan, apa iatu to kelok lalanna, tang dikapang-kapang anna tobang.

¹⁹Minda-minda tu umbuak padang, la dipedia’i, apa minda-minda tu unnula’ apa tae’ gai’na, la dipedia’i kakalalaran.

²⁰Iatu to manappa’ la sebo kamasakke-sakkeanna, apa minda-minda unnula’ kasugiran, tae’ nasalai tang diukung.

²¹Iatu umpelindo tau, tae’ namelo; moi anna kande sangsuakan, napobannang duka tau sala.

²²Iatu tau meullak matanna, maduang la madomi’ sugi’, sia tae’ natandai, kumua la narampoi kapu’duran.

²³Minda-minda tu umpakilala to senga’, manassa la unnappa’ kamasokanan undinna losong na iatu to malute massede.

²⁴Minda-minda tu urrampa apanna ambe’na sia indo’na, anna ma’tangnga’ kumua: tae’ nakasalan, tau iato solana to kadake.

²⁵Iatu tau tontong bang ungkaduangi ianan umpabu’tu kasisalan, apa minda-minda tu umposande’ PUANG, la dipedia’i tongan kameloan.

²⁶Minda-minda tu urrannuan kalena penaanna, iamo tobaga, apa minda-minda unnola lalan kakinaan, la tilendok,

²⁷Minda-minda tu ungkasokanni to bongko, tae’ nala kapu’duran, apa minda-minda tu untampunanni mata, la narua tampak ropu.

²⁸Iake unnappa’i kuasa tu to tang mekaaluk, la membuni tu mai tau, apa iake sabu’i tu tau iato, la kerangngan tu to malambu’.