Read Toraja-Sa'dan SARAMBU PEADA’ 3 Bible Online

SARAMBU PEADA’ 3 - Toraja-Sa'dan bible

SARAMBU PEADA’ 3

¹E anakku, da mutang kilalai tu pa’pangada’ku sia la nakaritutui penaammu tu mintu’ pepasanku,

²belanna iamo la urrangnganni mintu’ allomu sia taun katuoammu, sia umpopemba’ka’i tu karapasan penaammu.

³Da nasalaiko tu pa’kaboro’ sia kamarurusan! Pomanikki lan barokomu tu iannato sia sura’i dio papan penaammu,

⁴iake susito, la unnappa’ko pa’kamasean sia kadiporaian dio pentirona Puang Matua sia tolino.

⁵La ponno penaammu urrannuan PUANG sia da musande’ lako pakita penaammu.

⁶Kasiri’i tu Puang dio lu mintu’ lalanmu, na Ia la umpamarantei tu lalanmu.

⁷Da musande’ lako kakinaammu, sangadinna kataku’i tu PUANG sia patoyangko kalemu dio mai kakadakean,

⁸anna popedampii issimmu sia napopaya bukummu.

⁹Pakarayai tu PUANG mupennoloan kasugirammu, sia mintu’ bunga’ daka’mu,

¹⁰iake susito iatu mintu’ alangmu la ponno sae lako tang langnganna sia iatu to’ pa’parrammu la lempan uai anggoro’ ba’ru.

¹¹E anakku, da musayui tu peada’Na PUANG sia da mukasorroi tu ukunganNa.

¹²Belanna Naukung PUANG minda-minda tu Nakamasei, ondongpi susi misa’ ambe’ lako anak naala penaanNa.

¹³Maupa’ tu to unnappa’ kakinaan, sia iatu to ullolongan tangnga’ melo;

¹⁴belanna iatu sarona mandu melo anna saroan salaka, sia iatu apa napabu’tu mandu melo na bulaan.

¹⁵Mandu melo ia na merdan, sia mintu’ tu muporaianna tae’ dipasusianni.

¹⁶Dio lima kananna nanii tu kamalamberan sunga’, dio lima kairinna nanii kasugiran sia kamala’biran.

¹⁷Iatu batattana iamo batatta manaman, na iatu mintu’ lalanna iamo lalan marampa’.

¹⁸Iamo napooto’ katuoan minda-minda tu untoei, sia minda-minda tu ulla’ka’i la dipudi kumua to maupa’.

¹⁹Iatu PUANG umparandanganni kakinaan te lino, sia ullangda’i tangnga’ melo tu langi’.

²⁰Diona kapaissananNa anna tipa’dua tu mandalanna tasik sia iatu gaun umpapini-pini ambun.

²¹E anakku, da natoyang dio mai matammu tu iannato, karitutui tu pa’timbangan sia pa’timbang melo,

²²iake susito iatu iannato la napotuo deatammu, sia la napobelo baro- komu.

²³Ammu ola marampa’i tu lalanmu sia tae’ nala titodo tu lette’mu.

²⁴Iake matindoko tae’ mula tiramban, sangadinna la matindoko anna mammi’ mamma’mu.

²⁵Da mukataku’i tu katirambanan tang mukapang-kapang, sia kasangganganna to tang mekaaluk, ke saei.

²⁶Belanna PUANG tu la muposande’, sia Iamo la ungkampai tu lette’mu da naalai poya.

²⁷Da mupatadangi tu barang apa to sipatu la unnappa’i ke denni lan kuasammu la umpogau’i tu iannato.

²⁸Da muma’kada lako padammu tolino, kumua: Malemoko musae pole’mora masiangpa kubenko — anna denmo dio kalemu.

²⁹Da mutampanni kadake tu padammu tolino, tu ungkadamak meloko sia ussangako malolo.

³⁰Da musigaga moi misa’ tau ke tae’i bannangna, sia iake tae’i napogau’ kadake lako kalemu.

³¹Da mukemburui tu to masa’ga’ sia da mupilei la umpeolai moi misa’ tu lalanna,

³²belanna Nakagi’gi’ PUANG tu to leko’, apa iatu to bulo lollong Naposangmane tongan.

³³Iatu tampak ropunNa PUANG lan lu banuanna to tang mekaaluk, apa iatu inan nanii torro to malambu’ Napamasakke.

³⁴Iake denni to pa’tellean, Naissan Ia kalena untelle-tellei, apa Nakaturu-turui tu to umpamadiongan pena- anna.

³⁵Iatu to kinaa la umpomana’ kamala’biran, apa iatu to baga la ungkabu’tui siri’.