Read Toraja-Sa'dan SARAMBU PEADA’ 30 Bible Online

SARAMBU PEADA’ 30 - Toraja-Sa'dan bible

SARAMBU PEADA’ 30

¹Inde sia tu kadanna Agur, anakna Yake, KadanNa Puang Matua. Ma’kada te tau iate nakua: Mengkabo’yo’mo’, o Puang Matua, sia bonnongmo’.

²Belanna mandu bagana’ na iatu mintu’ tau sia tang unnampuina’ tangnga’ melo susi tolino.

³Sia tae’ duka kupelada’i kakinaan, kuurunganni untandai Puang Masero pindan.

⁴Mindara tu kendek langan langi’ sia songlo’ sule dao mai, mindara urrampun angin diong pa’ka’panna? Mindara umbungku’ uai diong tamang-kalena, mindara umpamanassai tu mintu’ randan langi’? Mindara tu sanganna sia mindara sanganna tu anakna muane? Manassa mutandai.

⁵Mintu’ tu kadanNa Puang Matua pura sudimo anna masero tongan; iatu to umpentionganNi Iamo napobalulang.

⁶Moi misa’ da murangnganni tu kadanNa, dikua da Nata’tanko sia da mudiapparan to buttok.

⁷Duang rupa tu apa Kupalaku lako Kalemi, da Mipadapanna’ kumane mate:

⁸Pamambelai dio mai kaleku tu kakelokan sia kada tang tongan, da Mibenna’ kakalalaran sia kasugiran, sangadinna kaduttu’na’ kande, iamotu taa silasangku.

⁹Dikua da kupeonganniKomi, ke kala’biammo’ sia da kuma’kada kumua: Mindara tu PUANG? sia da duka kuboko, kenarampoina’ kabongkoan sia da kutodotinting sanganNa Kapenombangku.

¹⁰Da mupa’pekabirisanni tu misa’ to mengkarang lako puangna, anna da nagataiko sia mutanggung kalena tu salana.

¹¹Den tu tau pira unggatai ambe’na sia tae’ napasakke indo’na.

¹²Iamotu tau, tu ussanga kalena masero dio pentirona, apa tang dibasei tu ruttakna.

¹³Iamotu pasoloran matanna sia madao pentirona.

¹⁴Iamotu to ma’isi susi pa’dang sia to ma’buang susi piso, la unnimbakan mintu’ tobongko, anna mata’pimo lan tondok sia tappumo tu to kalala’ dio lu pa’tondokan.

¹⁵Iatu lematik da’dua tu anakna baine, iamotu benni, benni! Inde sia tu tallu tang untandai kadiaran, sia a’pa’ tu tae’ len nama’kada nakua: Silasamo.

¹⁶Iamotu lino tomate, na pa’tambukan tamanang, kuli’na padang tu tae’ bang nama’kada nakua: Silasamo.

¹⁷Iatu mata untelle-telle ambe’na sia tang umbilang kamengkaolan lako indo’na, la natotokki kaduaya diong biring salu’-salu’ sia la nakande anak langkan maega.

¹⁸Inde sia tu tallung uluan kukamangngai, ondongpi patang uluan tu tang kupebuyu’;

¹⁹iamotu lalanna langkan maega dao langi’ na lalanna ula’ dao lu buntu batu, lalanna kappala’ lan tangngana tasik na lalanna misa’ muane sisola baine mangura.

²⁰Susimote tu lalanna baine pasandak salu lako rampanan kapa’: Ianna mangka kumande napa’diimi tu pudukna, anna ma’kada, nakua: Tae’ kupogau’ kadake.

²¹Iatu tallung uluan napotigega’ lino, ondongpi iatu a’pa’, tang naatta pissan:

²²Iamotu tete dio misa’ kaunan, ke dadimi datu, na tete dio misa’ to tang kebattuan, ke dipedia’i kande.

²³Tete dio baine disayu anna ditantang, ke dipobainei, na tete dio misa’ baine mengkarang tu ussuale puangna baine naia ussondai.

²⁴Inde sia tu a’pa’ bittikna dao kuli’na padang, apa lendu’ ia kinaanna;

²⁵iamotu sirrin misa’ bangsa malamma’, apa naparandan duka tu kinallona ke pealloanni;

²⁶na iatu kalinti to’ batu misa’ bangsa malamma’, apa nagaragai duka tu serangna lan buntu batu;

²⁷iatu batik tae’ datunna, apa ma’balole’ melo, ke tassu’i male;

²⁸na iatu bulilik ma’din nadammak tau, apa lan duka tongkonan layukna datu.

²⁹Inde sia tu tallu melo nasang tengkana, ondongpi iatu a’pa’ melo lingkana:

³⁰Iamotu singa, lalongna mintu’ olo’-olo’, tu tang sorong boko’ dio mai misa’ apa, ba’tu dio mai misa’ tau.

³¹Na iatu asu pangula’, ba’tu bembe’ laki, sia misa’ datu tu sisola surodadunna.

³²Iake umpamadaoko kalemu, anna tae’pa mutangnga’ meloi, ba’tu mangkami mutangnga’ melo, melo tampunni tu pudukmu.

³³Belanna iatu pangandu’, ke dilelu’i umpabu’tu bumbungan pa’pamakko, na iatu illong, ke ditumbukki kerara sia iatu kare’dekan ara’ ke dipatiludakki umpabu’tu kasigagan.