Read Toraja-Sa'dan SARAMBU PEADA’ 31 Bible Online

SARAMBU PEADA’ 31 - Toraja-Sa'dan bible

SARAMBU PEADA’ 31

¹Inde sia tu kadanna Lemuel, datu dio Masa, tu naadaranni indo’na.

²Apara, e anakku, (tu la kupokadangko)? io apara, e anak sun dikaleku? io apara, e anak pangallonangku?

³Da mupalulakoi baine tu kamatotorammu, sia iatu kasikadamakammu baine iato umpamandasa datu.

⁴Tang sipatu tu mai datu, e Lemuel, tang sipatu tu mai datu, ke pa’anggoro’i, sia iatu mai to paa ungkaduangi pangiru’ palango,

⁵kumua da namangiru’ sia da nakalupai tu apa dipondok sia nasondai tu katongannanna mintu’ to dipakario-rio.

⁶Benni pangiru’ palango lako minda-minda tu kapu’duran sia uai anggoro’ lako minda-minda tu rosso tongan penaanna.

⁷Da’ito nairu’i anna kalupai tu kakalalaranna sia anna tae’ naingaranni tu kamandasanna.

⁸Bungkaranni pudukmu tu to tang naissan ma’kada, belanna la untonganan mintu’ to mandasa tongan.

⁹Bungka’i tu pudukmu, ammu mangra’ta’ malambu’, sia sanda tonganni tu to dipakario-rio sia to bongko.

¹⁰Mindara la unnappa’ misa’ baine birisan sia kinaa? iatu angga’na mandu losong na merdan.

¹¹Iatu muanena ungkatappa’i, naurungan tang kurang tu bua sara’na.

¹²Kameloan bang tu napogau’ lako kalena, tangia kakadakean lan mintu’ katuoanna.

¹³Umpasirundunan ia bulu domba sia rami, sia matipa tu limanna ungkarangi tu apa iato.

¹⁴Susi ia kappala’ pa’balili, sia unnala kandena dio mai tondok mambela.

¹⁵Millikmo ia, ke mabongi bang siapi, sia umben kande to nakurinni sia napamanassan pengkarangan tu mai baine rurananna.

¹⁶Iake la morai unnampui misa’ pa’lak manassa la naappa’, sia diona bunga rangka’na natananni misa’ pa’lak anggoro’.

¹⁷Ma’kamandi’ anna matoto’ mengkarang, sia umpabussu limanna.

¹⁸Nasa’dingmo, kumua maupa’ tu pa’balilinna, iake bongi tang pa’de lenmo tu palitanna.

¹⁹Tontong bang natoe tu unuran sia umpasule-sule panikuan.

²⁰Tontong nabungkaran pala’na tu to bongko, sia natadoi lima tu to mase-mase.

²¹Tae’ namataku’, narampoi ambun makko tu rurananna, belanna mintu’ rurananna ma’tamangkale karamisi.

²²Nagaragammi kalena tu paramadani; iatu lenang melo sia lango-lango makaseda tu napotamangkale.

²³Iatu muanena katandan dio lu babangan, ke unno’ko’i sola mintu’ pekaamberan lan tondok.

²⁴Nagaragaimi tu tamangkale lenang anna balukanni; sia beke’ naparandan la nabalukan lako to ma’baluk.

²⁵Kamatotoran sia kamala’biran tu napotamangkale, iatu allo undi napokaparannuan.

²⁶Situang kakinaan, ke tiku’bi’i tu pudukna, masokan tu pa’pangada’ dara’ lengko lilana.

²⁷Natiro melo tu lalan pengkaranganna to lan banuanna, sia tang ungkande roti tang nakara’ta’i.

²⁸Iatu mai anakna muane bendan sia napudi tu kamauparanna, sia ia duka tu muanena untendengi, nakua:

²⁹Buda tu mai pia baine mandu matipa, apa musau’ nasang tu mintu’nato!

³⁰Iatu kamaballoan pa’kaleanna misa’ baine ma’pakena sia iatu kameloan pantarisanna tae’ gai’na, apa misa’ baine ungkataku’ PUANG, iamo sipatu dipudi.

³¹Benni lako tu bunga rangka’na, sia iatu penggauranna la umpudi lan babangan tondok!