Read Toraja-Sa'dan SARAMBU PEADA’ 5 Bible Online

SARAMBU PEADA’ 5 - Toraja-Sa'dan bible

SARAMBU PEADA’ 5

¹E anakku, palan penaai tu kakinaangku, sia tananni talingammu tu diona tangnga’ kinaangku,

²ammu karitutui tu pa’timbang melo, sia nakaduttu’i pudukmu tu kapaissanan.

³Belanna iatu pudukna baine to senga’ to’do tani’ enoan, sia iatu lingarona mandu malannang anna boka’,

⁴apa ma’katampakanna mapai’ susi apsantin sia mataran susi pa’dang mataran patomali.

⁵Iatu lette’na lu rokko kamatean, sia iatu tengkana lu lako lino tomate.

⁶Dikua da musepang lako lalan katuoan, iamoto nama’papusa tu tengkana, natae’ mutandai tu iannato.

⁷Iamoto, e anakku sola nasang, perangiina’ sia da miboko’i tu kada sun dio pudukku.

⁸Toyangangko lalanmu dio mai tu baine susito, sia da mureke’i tu ba’ba banuanna,

⁹kumua da musorongi tu kamala’birammu lako to senga’ sia iatu taun katuoammu lako to tang untandai kamamasean;

¹⁰kumua da anna to sae umpediaranni kalena tu iananmu, sia saro ra’ta’mu, da natama banuanna to tang ditandai,

¹¹muurunganni sumarro, ke ma’katampakannai, ke pu’pu’ nasangmi tu duku’mu sia kalemu.

¹²Sia ma’kadako kumua: Umba kukua to kukagi’gi’i tu peada’ sia nasayui penaangku tu pa’pakilala!

¹³Ma’apari natae’ kuperangii tu kadanna gurungku, sia tae’ kutananni talinga tu to unnada’ina’!

¹⁴Sidi’mora kulamma’ rokko mintu’ kamandasan — lan lu tangnga kombongan sia kasirampunan.

¹⁵Melo ke unniru’ko uai lan mai bubun batummu siamo, tu nanii uai uran, sia uai tuo diong mai bubunmu siamo.

¹⁶Mueloranraka tu kalimbuangmu lolong dao lu batatta, sia salu’-salu’mu dao lu tana lapang?

¹⁷Melo ke iko manna umpoapai, da naden to senga’ musolan.

¹⁸Namasakke-sakkemora tu kalimbuangmu, sia la parannuko diona tu bainemu, tommu mangurapa,

¹⁹iamotu misa’ donga birang maelo sia misa’ donga’-donga’ maballo; da’ito natontong tarru’ umpasendeko tu susunna, sia tontong umpatiakka’ penaammu tu kamamaliranna.

²⁰Ma’apai, e anakku, ammu lamban bainena to senga’ sia urraka’ dadanna to tang ditandai.

²¹Belanna iatu lalanna simisa’-misa’ tau payan dio pentiroNa PUANG, Napenunu tu mintu’ tengkana.

²²Iatu to tang mekaaluk la napungo kalena kakadakeanna, sia la napurru’ poya kasalanna.

²³Belanna tae’ naturu’i tu peada’, iamoto nala mate, sia napapusamo kaliu-baganna.