Read Toraja-Sa'dan SARAMBU PEADA’ 6 Bible Online

SARAMBU PEADA’ 6 - Toraja-Sa'dan bible

SARAMBU PEADA’ 6

¹E anakku, iake unnindo’iko indanna padammu tolino, sia iake mupessala’panni tu limammu diona to senga’;

²iake napoyamoko kada sun dipudukmu, sia natingkanmoko ba’tikan dara’ lengko lilamu —

³pogau’mi te, e anakku, ammu lendokan kalemu, belanna tobangmoko tama lisu pala’na padammu tolino; malemoko, ammu pakasa-kasai sia pandasa tonganni;

⁴dapa mueloranni tu matammu mamma’ sia kulimbang matammu tikkaru’du’;

⁵lussurangko kalemu susito kijang dio mai limanna to rumangngan, sia susito manuk-manuk dio mai limanna to ma’poya.

⁶E pong tukkunan, maleko lako to’ sirrin, pemarangai tu lalanna ammu kinaa;

⁷moi anna tae’ ia tu pangulunna, ba’tu mantari’na, ba’tu to ma’parentana,

⁸naparandan duka ia tu mai kandena, ke pealloanni, sia narampun duka ia tu kinallona, ke pegandunganni.

⁹Sangapaporoko la mamma’, e pong tukkunan, pirampira mumane millik dio mai kamammarammu?

¹⁰La mamma’pa’ sattu’, la mamma’-mamma’pa’ sattu’, la umpasikala’pa’ limangku umbambangan kaleku sattu’.

¹¹Iammu susito la narampoiko kamakario-rioan butung misa’ to sae ma’dondo, sia iatu kataerammu susi misa’ to ma’pa’buno.

¹²To bulituk sia to umpabu’tu kakadakean, iamotu to umbulang leko’ kada,

¹³napopa’kidi’-kidi’ tu matanna, sia napopassodo-sodo tu lette’na sia napopa’dullu-dullu tu tarunona,

¹⁴tu untannun bang tangnga’ bulituk lan penaanna, sia tontong bang untampa kakadakean, sia umpabu’tu kasigagan.

¹⁵Iamoto iatu kasangganganna urrampoi tang dikapang-kapang, ta’pa la diru’puk, naurungan tae’mo nakullei dipamondo.

¹⁶Inde sia tu annan pasirua tu Nakabiri’ PUANG, ondongpi pitu tu Nakagalli tongan:

¹⁷Mata tumongnga’, lila kamorang-morang, lima umpatibollo rarana to tang kasalan,

¹⁸penaa untannun tangnga’ pepayu sia lette’ tang tipodo’ lako kaka- dakean,

¹⁹tu umpenaan buttok susito sa’bi tang tongan sia umpabu’tu kasigagan dio lu to massiulu’.

²⁰E anakku, karitutui tu pepasanna ambe’mu sia da musuale pa’pangada’na indo’mu.

²¹Palanni lakka buamu, sia pomanikki lan barokomu.

²²Iake lumingkako, denno upa’ naia ussolangko: sia iake pana’dingmoko, denno upa’ naia umpa’kadaiko.

²³Belanna iatu pepasan iamo misa’ palita, iatu pa’pangada’ iamo misa’ arrang, sia iatu pa’pakilala lu dio mai peada’ iamo lalan ma’palulako katuoan,

²⁴tu la umpatoyangko dio mai baine sala’ kedo, dio mai lila panglono’ to tang ditandai.

²⁵Da nabu’tu lan penaammu tu kamoraian lako pantarisan melona, sia da naalako kidi’ matanna.

²⁶Belanna pa’katumangna baine bualang anna kapu’duran kande tau, sia bainena to senga’ unnula’ katuoan mala’bi’na tau.

²⁷Ma’dinraka tu tau untambuk api, anna tang la ungkandei tu tamangkalena?

²⁸Ma’dinraka tu tau lumingka dao ruaya anna tae’ namampu’ tu lette’na?

²⁹La susi dukato tu to umpasurruk kalosi dibuni lako bainena solana; tae’ misa’ tu to ungkaka’i, la dibilang masero dio mai sala.

³⁰Tae’ nalo’boi tau tu toboko, ke bokoi la umpedia’i tambukna ke tang dia’i.

³¹Apa iake diapparanni, manassa la nasondai sule pempitu manglokkon, sia mintu’ tu apa lan banuanna la nasorong.

³²Minda-minda tu ma’pangan buni sola misa’ baine, iamoto tae’ inaanna; minda-minda tu umpogau’i te, ussanggang kalena.

³³Kamatilakan sia kadipamatunan la nalolongan, sia iatu kaditattanna tae’ nala dipa’dei.

³⁴Belanna iatu kamangimburuan iamo api ma’lulu-lulunna misa’ muane, sia tae’ natandai tu kamamasean, ke allo nanii ma’pabala’;

³⁵tae’ natarimai moi umba susitu pela’bak, sia tae’ nakamorai pamengan, moi anna mandu buda.