Read Toraja-Sa'dan SARAMBU PEADA’ 9 Bible Online

SARAMBU PEADA’ 9 - Toraja-Sa'dan bible

SARAMBU PEADA’ 9

¹Nabangunmo Kakinaan tu banuanna, sia napa’mo tu lentongna pitu.

²Natunumi tu patuoan direre’ sia napasito’bo’ tu uai anggoro’na sia napasakka’ tu medana.

³Nasuami tu passolanna baine, metamba dao lu inan madao lan kota, nakua:

⁴Minda-minda tu tang unnampui tangnga’ melo, la tibalik anna sepang lu mai; naminda-minda tu tang paissan nakua ungkuanni:

⁵Maimokomi, kandemi tu kandeku sia iru’mi tu uai anggoro’ku tu mangka kupasito’bo’.

⁶Tampemi tu mintu’ katangpaissanan, ammi tuo, sia olaimi tu lalan tangnga’ kinaa.

⁷Minda-minda unta’tan to patelle-telle la ungkabu’tui kalena siri’, minda-minda unnada’i to tang mekaaluk, umpadenan kalena kaditattan.

⁸Da muta’tanni tu to patelle-telle, da nakabiri’ko, sangadinna ta’tanni tu to kinaa, anna kamali’ko.

⁹Pangada’i tu to kinaa, anna sakerangngan-rangnganna tu kakinaanna, ada’i tu to malambu’, anna kerangngan tu pa’inaanna.

¹⁰Ungkataku’ PUANG iamo pamulanna kakinaan sia untandai To tarru’ masero iamo garonto’na tangnga’ kinaa.

¹¹Belanna tete dio kaleku anna dipakerangngan tu allomu, sia anna dipamalambe’ tu sunga’mu.

¹²Iake kinaako iko kalena umpoupa’i, sia iake to pa’telleko, iko kalena umpassanni.

¹³Iatu Indo’ baga ma’pamareko, moi misa’ tae’ natandai, sia tang unnissan apa.

¹⁴Sia unno’ko’ dio to’ ba’ba banuanna dao kao’koranna dao inan madao lan kota,

¹⁵la untambai tu mintu’ to lendu’ dio lalan iato, tu to lumingka malolo, kumua:

¹⁶Minda-minda tu tang unnampui tangnga’ kinaa nasepang mai, minda-minda tu tang paissan nakua ungkuanni:

¹⁷Iatu uai diboko matappa’, sia iatu roti dikande buni mammi’.

¹⁸Apa iatu tau iato tae’ natandai, kumua inde to dio, inan bombo tomate, sia mintu’ tu to natambai diongmo likunna lino tomate.