Read Toraja-Sa'dan TOMANGADA’ 1 Bible Online

TOMANGADA’ 1 - Toraja-Sa'dan bible

TOMANGADA’ 1

¹Inde sia tu kadanna Tomangada’, anakna muane Daud, datu dio Yerusalem.

²Tae’ liu gai’na, kadanna Tomangada’, tae’ liu gai’na! Mintu’na tae’ nasang gai’na!

³Apara sarona tu tolino lan mintu’ ra’ta’na, tu nakara’ta’i, lan naarrang matanna allo?

⁴Sangosso’ male, sangosso’ pole’o sae, apa iatu lino tontong bang tumanan.

⁵Iatu mataallo bu’tu sia lambun, sia seka-seka ma’dondo lako to’ inan nanii bu’tu.

⁶Iatu angin mangiri’ ma’palusau’, namane tibalik ma’palurekke, natontong male mengguririk, nasuleo dio pengguririkanna.

⁷Iatu mintu’ salu lolong tama tasik, apa tae’ naponno len tu tasik; iatu naninna salu lolong, inde dukato nanii tontong lolong.

⁸Iatu mintu’na apa mepamata’ka’, tang dikemba’ disa’bu’; iatu mata tang namoso mentiro sia iatu talinga tang naponnoi pa’peranginna.

⁹Iatu apa denmo dolona, ia dukato tu la den; sia iatu apa dipogau’mo, ia dukato tu la dipogau’; moi misa’ tae’ tu ba’runna lan naarrang matanna allo.

¹⁰Iake den misa’ apa tu napokada tau: Tiromi, iamote tu ba’ru — inang denmo ia dolo-dolona to na linota.

¹¹Pa’demo tu kapengkilalan diona apa dolo, susi dukato tu apa undi tae’mo nala den tu kapengkilalan lako tu to undi.

¹²Akumo tu Tomangada’ datunna to Israel dio Yerusalem;

¹³sia kupapatuimo penaangku la untuntun tonganni sia umparessai tu kakinaan lan mintu’ apa dadi nasambo langi’. Iamoto tu misa’ pengkarangan masussa Nasorong Puang Matua lako ma’rupa tau kumua anna mara’ta’ ungkarangi.

¹⁴Kupemarangamo tu mintu’ pengkarangan tu dikarang lan naarrang matanna allo, manassa mintu’nato tae’ gai’na sia susito unnula’ angin.

¹⁵Iatu apa kelok tae’ nakullei malolo, sia iatu apa kurang tang dikemba’ diia’.

¹⁶Sipa’kadamo’ kaleku kukua: Manassa kupakapuamo sia kupabudamo tu kakinaan losong na iatu mintu’ to dolo na aku tu umparenta Yerusalem; na iatu penaangku unnappa’mo kaseboanna kakinaan sia kapaissanan;

¹⁷susimoto kunii umpatu’tunni lan penaangku la untandai tu kakinaan sia kapaissanan sia kabagan sia katangpaissanan. Apa kutandaimo, kumua ia duka tu iannato susiki’ to unnula’ angin.

¹⁸Belanna kabudanna kakinaan nanii buda kamasussan, sia iake den tau urrangnganni kapaissananna, urrangnganni duka karossoanna.