Read Toraja-Sa'dan TOMANGADA’ 10 Bible Online

TOMANGADA’ 10 - Toraja-Sa'dan bible

TOMANGADA’ 10

¹Iatu ba’tu pira-pira kasisi’ mate umpabosi sia umpare’de salapna to unggaragai salap; susi dukato tu kabagan sidi’, matoto’ unnala penaanna tau na kakinaan sia kamala’biran.

²Iatu penaanna to kinaa ma’palulako kanan, apa iatu penaanna te baga ma’palulako ia kairi.

³Umba-umba naola tu tobaga, tae’ tu tangnga’ melona sia iatu kadanna umpamanassai lako mintu’ tau, kumua tobaga ia.

⁴Iake re’dekki ara’na tu misa’ to ma’parenta lako kalemu, da mutampei tu inanmu, belanna kama’tanan penaa ma’din undampa sala kapua.

⁵Den tu misa’ kakadakean kutiro lan naarrang matanna allo, iamotu misa’ kapusan bu’tu dio mai to paa:

⁶iatu tobaga diangka’ unnii pangka’ ma’iringanna, apa iatu tomala’bi’ sia tosugi’ torro bang diong pangka’ madiongan.

⁷Kutiromo tu kaunan ussakei darang na iatu mai datu lumingka susi pa’dua’.

⁸Minda-minda umbo’bok patuang, iamo la tobang rokko, sia minda-minda ullo’po’ rinding tembo’, iamo la natotokki ula’.

⁹Minda-minda urrondon batu, la nabangkei sia minda-minda umpiak kayu, la nasanggangi.

¹⁰Iake pumpumi tu bassi sia tae’ nadiasa tu matanna, manassa la diea kamawatangan, apa iatu kakinaan iamo lalan mandu melo lako kamauparan.

¹¹Ianna ma’totokki dolo tu ula’, namane dipokada tu pa’basa-basa, tae’mo gai’na tu to ussa’bu’ pa’basa-basa iato.

¹²Iatu kada tassu’ dio mai pudukna to kinaa iamo umpabu’tuanni kamasokanan, apa iatu lilana tobaga unnampello’ kalena tu tobaga iato.

¹³Iatu kada bunga’ sun dio randan pudukna iamo katangpaissanan, anna ma’katampakanna iamotu kabagan pasanggangan.

¹⁴Sia ia duka tu tobaga umpabuda kadanna — apa iatu tolino tae’ natandai tu apa la dadi, anna iatu apa la dadi undinna, mindara la umpaissanni?

¹⁵Iatu kamara’takanna tobaga umpamata’ka’ tonganni, belanna tae’ natandai tu lalan ma’palutama kota.

¹⁶Upu’ allona tu tondok, ke piapi tu datunna sia iatu mai arungna, ke melambi’pi narandukmo kumande sia mangiru’.

¹⁷Maupa’ tu tondok, ke bati’ to la’bi’ tu datunna sia iatu arungna kumande sia mangiru’ lan attunna, (tu ussau’ kamoraianna) susi muane sia tae’ nasusi to pa’malangoan.

¹⁸Belanna diona kamatukkunan, anna marapo tu pa’kayuan sia diona lima tangbirisan, anna lo’po’ tu banua.

¹⁹Napogau’mo tau tu pa’maruasan, anna poparannui penaanna, sia iatu uai anggoro’ umpamarua’ katuoanna tau, sia iatu doi’ umpadenni tu mintu’nato.

²⁰Da mugatai tu datu, moi nalan pa’tangngarammu, sia da mugatai tu tosugi’ lan bilik kamammarammu, nabaa manii manuk-manuk dao langi’ tu gamarammu sia napa’peissanan manii dassi tu apa mupokadanna.