Read Toraja-Sa'dan TOMANGADA’ 12 Bible Online

TOMANGADA’ 12 - Toraja-Sa'dan bible

TOMANGADA’ 12

¹Iamoto, kilalai tu Totumampamu lan attu kamangurammu, namane sae tu allo kadake sia taun, tu la mupokada diona a’ganna: Tae’ naalai penaangkuto.

²Iake tae’pi mata allo sia arrang sia bulan sia mintu’ bintoen la malillin, sia iatu salebu’ sae sule, ke mangkai uran.

³Allo iato la ma’parondo tu pa’kampa banua sia bukku’ tu to mawatang sia iatu baine manglelu’ torro manglelu’, belanna sosso’mo tu bilanganna, sia iatu mentirona dao mai pentiroan maraunmo.

⁴Sia iake titutu’mi tu da’dua papan ba’ba ma’palulako lalan, sia iake tang malesomi tu oni pangleluran sia ma’kissak-kissak tu gamara susi oni manuk-manuk sia tang maseromo tu mintu’ oni dirangi.

⁵Iake nakataku’i tau tu inan matande sia den apa napotiramban dio lu lalan; to ke menta’bimi tu garonto’ badam sia iatu batik napela’-pela’ bang lumingka sia iatu bunga kappari’[1] tae’mo gai’na — , belanna iatu tolino sule lako banua matontonganna sia mintu’ to umbating lu lako lu dio mai dio lu batatta.

⁶Iake tae’pi nadibukai tu rante-rante salaka sia sanggang tu palita bulaan, ke tae’pi natesse tu busso dio to’ kalimbuang sia le’to tu lentenan petimba diong to’ bubun,

⁷sia iatu litak sule rokko padang, susi a’gan dolona, sia iatu penaa sule lako Puang Matua, tu mangka ungkamaseanni.

⁸Tae’ liu gai’na, kadanna Tomangada’, mintu’na tae’ nasang gai’na!

⁹Tangia manna kinaa tu Tomangada’, sangadinna naada’i duka ba’tu pira-pira kapaissanan tu to buda; anna ma’timbang sia ma’nannung sia untono’ buda kada peada’.

¹⁰Napengkaolai Tomangada’ la ullolongan kada mammi’, sia ussura’ misa’ sura’ tongan sia kada matappa’.

¹¹Iatu kadanna to kinaa susito panusuk; iatu pa’pulung kadanna susito petangki’ manda’ dilammak; mintu’nato nakamaseanni tu to mangkambi’ misa’ri.

¹²Na iatu senga’nato, e anakku, kana’nai tu kalemu, belanna iatu untono’ buda sura’, tae’ upu’na, sia iatu umparessa buda apa, umpalangga’ kaleta.

¹³Inde sia tu kada ma’katampakanna tu mintu’ apa narangimo tau, iamotu kataku’i tu Puang Matua sia karitutui tu mintu’ pepasanNa, belanna iamoto tu sipatu lako mintu’ tolino.

¹⁴Belanna iatu simisa’-misa’ penggauranna tau la Napopennolo Puang Matua tama pa’paolaian salu diona tu mintu’ apa membuni, la melona, la kadakena.