Read Toraja-Sa'dan TOMANGADA’ 3 Bible Online

TOMANGADA’ 3 - Toraja-Sa'dan bible

TOMANGADA’ 3

¹Iatu mintu’ apa den attunna sia iatu apa la dadi nasambo langi’ den nasang allona.

²Den tu attu kakianakan sia den tu attu kamatean, den tu attu mantanan sia den tu attu manglampi’.

³Den tu attu papatean sia den tu attu ma’pamondo, den tu attu mangrondon sia den tu attu ma’pate’dek.

⁴Den tu attu katumangiran sia den tu attu kametaan, den tu attu dinii umbating sia den tu attu dinii ma’gellu’.

⁵Den tu attu dinii untibean batu sia den tu attu dinii urrampun batu, den tu attu dinii mangraka’ sia den tu attu dinii umpatoyang kale dio mai mangraka’.

⁶Den tu attu dinii mandaka’ sia den tu attu dinii ma’pa’dean, den tu attu dinii manganna sia den tu attu dinii massuale.

⁷Den tu attu dinii masserek sia den tu attu dinii mandasi’, den tu attu dinii ma’pakappa sia den tu attu dinii ma’ulelean.

⁸Den tu attu dinii ma’pakaboro’ sia den tu attu dinii ungkabiri’ tau, den tu attu parari sia den tu attu kasitaman.

⁹Apara napolean tu to mengkarang dio mai tu apa nakara’ta’i?

¹⁰Kupemarangamo tu pengkarangan Nasorong Puang Matua lako mintu’ ma’rupa tau kumua anna mara’ta’ ungkarangi.

¹¹Mangkamo Napadadi melo tu mintu’na lan attunna sia Napatama duka lan penaanna tolino tu pa’tangngaran diona apa situran-turan tempon dio mai, apa moi misa’ tae’ natandai tolino tu diona pengkarangan Nakarang Puang Matua dio mai pamulanna sae lako ma’katampakanna.

¹²Kutandaimo, kumua tae’ na tolino ungkuasai tu iannato, apa iake parannui sia umpasannang kalena lan mintu’ allo katuoanna,

¹³kondi’na, kumua ke denni tau kumande sia mangiru’ sia umperasai melona dio mai mintu’na kamara’tasanna, iamoto tu pa’kamaseNa Puang Matua.

¹⁴Kutandaimo, kumua iatu mintu’ pengkaranganNa Puang Matua, matontongan; tae’ tau ma’din urrangnganni ba’tu unnalai; sia Napogau’ Puang Matua tu iannato, kumua anna mataku’ tu tau dio oloNa.

¹⁵Mintu’na tu apa den totemo, inang den dolomo, sia iatu apa la den inang den dukamo dolona; sia Natuntun pole’ Puang Matua tu apa lendu’mo.

¹⁶Den siapa kutiro tu inan pa’paolaian salu lan naarrang matanna allo: inde to nanii kakelokan; sia iatu inan nanii kamaloloan; inde to nanii katangmalamburan.

¹⁷Sipa’kadamo’ kaleku kukua: Puang Matua la umpaolai salu to malambu’ sia to tang malambu’, belanna iatu mintu’ apa sia mintu’ pengkarangan pantan den attunna.

¹⁸Sipa’kadamo’ kaleku kukua: Iatu diona ma’rupa tau la Nata’piimo Puang Matua sia la Napasomboammo, kumua iatu a’ganna susi bang olo’-olo’.

¹⁹Belanna iatu lampakna ma’rupa tau susi bangsia lampakna olo’-olo’, ondongpi misa’ lampakri sola duai: susitu olo’-olo’ mate, susi dukato tu ma’rupa tau mate, sia sangrupari tu napopenaa sola nasang, tae’ tu losongna tolino na olo’-olo’; belanna iatu mintu’nato tae’ gai’na.

²⁰Iatu mintu’nato misa’ri inan nakarampoi, sia mintu’nato lu dio nasangi mai litak sia la sule pole’ lako litak.

²¹Mindara untiroi tu penaanna ma’rupa tau kendek langngan anna iatu penaanna olo’-olo’ ma’palurokko mangapi’na tana?

²²Iamoto kutandaimo kumua tae’ ia losong melona, sangadinna iatu tolino umposende mintu’ pengkaranganna, belanna iamoto tu taana belanna mindara la umpatunduk tolino la umpoparannui tu apa la dadi, ke matemi.