Read Toraja-Sa'dan TOMANGADA’ 4 Bible Online

TOMANGADA’ 4 - Toraja-Sa'dan bible

TOMANGADA’ 4

¹Kutiro pole’omi tu mintu’ pa’pakario-rio tu dipogau’ lan naarrang matanna allo, tiromi tu uai matanna mintu’ to dipakario-rio, namoi misa’ tae’ tau umpakatanai tu tau iato mai; rampe dio tu to ma’pakario-rio den kakuasan — namoi misa’ tae’ tau umpakatanai tu tau iato mai.

²Iamoto kupudii tu mintu’ tomate, tu masaimo ka’tu sunga’na, kumua losong upa’na na mintu’ to tuo, tu tuopa sae lako totemo.

³Sia kumua losong pole’pa ia upa’na na mintu’ tau iato tu to tae’pa nadadi sia tae’pa natiroi tu penggauran kadake tu dipogau’ lan naarrang matanna allo.

⁴Kutiro duka, kumua iatu mintu’ sara’ sia mintu’ kamalintaran mengkarang, umpabu’tu kamangimburuanna misa’ tau lako solana; ia duka tu apa iato tae’ gai’na sia susito unnula’ angin.

⁵Iatu to baga ma’koko kalepak sia ungkande duku’ kalena.

⁶Iatu kamanamanan sangraku’ losong melona na iatu duang ka’pan ponno sara’ sia unnula’ angin.

⁷Kutiro pole’omi tu misa’ apa tae’ gai’na lan naarrang matanna allo;

⁸iamotu misa’ tau tae’ solana, moi anakna ba’tu siulu’na tae’ duka, apa moi susito tae’ duka upu’na tu mintu’ sara’na; sia tae’ namangingngi’ tu matanna untiroi tu mintu’ kasugiranna; — mindara la umpomaupa’i angku mara’ta’ bangra sia tang unneloran kaleku umperasai tu melona? Ia duka tu iannato tae’ gai’na sia misa’ apa kadake.

⁹Iatu tau ke da’duai, melo na ia ke misa’ri, belanna melo lako sola duai tu poleanna pengkaranganna.

¹⁰Iake songkai sola duai, iatu misa’na ma’din umbangunan pole’i tu misa’na, apa upu’ dikka’ allona tu to misa-misari, ke songkai, belanna tae’ tu sangayokanna la umbangunan pole’i sule.

¹¹Susi dukato, ke denni da’dua tau siammu’ mamma’, malassu tu kalena sola duai, apa iatu to misa’ri, umba la nakua umpamalassu kalena?

¹²Iake ma’dinni misa’ tau untalo tau misa’, manassa iatu tau da’dua nakullepa bendan unneai; sia iatu tallu ulang dipasiulang, tae’ namadomi’ dika’tuan.

¹³Misa’ pia muane kinaa, moi anna bongko, mandu melo na iatu misa’ datu matua, apa baga, tu tang umperangii pa’pakilala.

¹⁴Belanna iatu pia muane tassu’ lan mai pa’tarungkuan la diangka’ datu, moi anna dadi dio mai to bongko tonna lanpa kadatuanna tu datu iato.

¹⁵Kutiro tu to tuo lan naarrang matanna allo, unturu’ to mangura, tu la ussondai tu datu iato.

¹⁶Tae’ bang upu’na tu to buda, iamotu mintu’ to undi unturu’i. Apa iatu to dadi undi tae’mo naposendei. Tonganna ia duka tu apa iato tae’ gai’na sia susito unnula’ angin.

¹⁷Kanandai tu lentekmu, ke maleko lako banuanNa Puang Matua; belanna iake mennoloko ma’perangi melo ia na iatu mintu’ pemala’ tu napemalaran to baga, belanna tae’ naissanni, kumua umpogau’mo kadakena.