Read Toraja-Sa'dan TOMANGADA’ 7 Bible Online

TOMANGADA’ 7 - Toraja-Sa'dan bible

TOMANGADA’ 7

¹Mandu melo tu sanga melo na iatu minna’ pandere’ busarungngu’, sia melo iatu allo kamateanna tau na iatu allo kadadianna.

²Melo tu tama banua nanii passanda bolong na iatu tama banua nanii pa’maruasan; belanna iatu iannato iamo ma’katampakanna katuoanna mintu’ tolino, sia melo ke napalan penaai to tuo tu iannato.

³Melo tu karossoan penaa na iatu metaa, belanna iatu kamaru’gunan napotanda kamaloloan penaa.

⁴Iatu penaanna to kinaa lan ia banua nanii passanda bolong, apa iatu penaanna to baga lan ia banua nanii kaparannuan.

⁵Melo ia tu umperangii peta’tanna to kinaa na iatu umperangi sengona to baga.

⁶Belanna susi duri mema’tu diongna lu kurin, susi dukato tu pelale’ to baga. Ia duka tu apa iato, tae’ gai’na.

⁷Tonganna iatu pa’pakario-rio umpopendadi baga to kinaa sia iatu pappe’ ungkadakei penaa.

⁸Melo ia ma’katampakanna tu misa’ apa na iatu pamulanna; melo iatu to kalando pesuka’, na iatu to madao penaa.

⁹Da mumadomi’ umpatiludakki tu ara’mu, belanna iatu ara’na to baga, iamo inan saki inaa.

¹⁰Da muma’kada kumua: Matumbari anna melo ia tu mintu’ attu dolo na iatu attu totemo? Belanna tae’ nabannang dio kakinaan munii umpekutananni tu iannato.

¹¹Iatu kakinaan pada melona mana’ sia napoupa’ tu to untiro mata allo.

¹²Belanna iatu kakinaan dipopentionganan, susi duka tu doi’, apa tapoupa’ ke taissanni kumua iatu kakinaan napotuo mintu’ to unnampui.

¹³Nannungi tu mintu’ pengkaranganna Puang Matua, belanna mindara ma’din umpamaloloi tu apa Napakelok?

¹⁴La paiman penaammu lan attu kamauparan, apa kilalai dukai lan allo kamasussan, kumua pada Napadadi Puang Matua tu iannato; belanna moi misa’ apa tae’ nalambi’i natandai tau tu apa la dadi undinna.

¹⁵Sanda rupannamo tu apa kutiro lan mintu’ allo katuoangku tu tae’ gai’na: Den tu to malambu’ sanggang moi naden kamaloloanna sia den tu to tang mekaaluk malambe’ sunga’na moi naden kakadakeanna.

¹⁶Da mutarru’ malambu’ sia da mutarru’ ma’gau’ kinaa, ma’apai mula umpabuyu’ kalemu?

¹⁷Da mutarru’ tang mekaaluk sia da mubaga; ma’apai mula matemo, natae’pa nalambi’i attunna?

¹⁸Melo ke mukaritutui tu misa’ sia da murampananni tu misa’na, belanna minda-minda ungkataku’ Puang Matua la tilendok dio mai mintu’nato.

¹⁹Iatu kakinaan umpabu’tuan kuasa to kinaa losong na iatu kuasa naampui sangpulo to paa lan misa’ kota.

²⁰Belanna tae’ misa’ to malambu’ susito dao kuli’na padang, naurunganni melona manna napogau’ sia tae’ nakasalan.

²¹Da duka mupalan penaai tu mintu’na napokada tau, kumua da murangii tu taummu kalena unggataiko.

²²Belanna pembudamo tuo lan penaammu, kumua unggatai dukako to senga’.

²³Mintu’nate kusudi, angku appa’ kakinaan sia ma’kadana’, kukua: moraina’ la unnappa’ kakinaan, apa tae’ kulambi’i.

²⁴Mintu’ apa den tang dilambi’ dirundunan, sia tang dilambi’ disandak, mindara ma’din untarru’i?

²⁵Kupapatui penaa tu iannato sia naparinaamo penaangku la unnappa’ kapaissanan, la ma’paressa sia la undaka’i tu pa’rampoananna situang kakinaan sia la untandai, kumua iatu katangmekaalukan iamo kabagan sia iatu katangpaissanan iamo kapusan.

²⁶Kuappa’mi tu misa’ apa mapai’na kamatean, iamotu baine tu susi poya sia penaanna susi bunde sia iatu limanna sangtinti pepungo. Minda-minda tu naala penaanNa Puang Matua, tilendok dio mai, apa minda-minda tang naala penaanNa Puang Matua la nala’ka’i.

²⁷Tonganna, indemo tu kuappa’, kadanna Tomangada’ — kupasitimbang tu misa’ na iatu misa’na, la ungkabu’tui tu misa’ pa’rampoanna,

²⁸tu tontongpa kudaka’, apa tae’ kuappa’i — : dio lu to sangsa’bu, kuappa’ misa’ to tongan, apa misa’ baine tongan tae’ bang kuappa’ dio lu tau iato mai.

²⁹Ia manna mitandaite, iamotu kuappa’mo kumua mangkamo Napadadi malolo Puang Matua tu tolino, apa undaka’mo buda kira-kira tu tau iato mai.